Дүбірлі додада ел намысын қорғайтын құрама қатарынан табылуға ниетті жастардың көп екені, дайындықты бастағаны анық. Оған Арыс қаласында өткен жарыста көз жеткіздік.
Түркістан облысының құрылғанына 5 жыл толуына орай ұлттық спорт ойындарының 5 түрінен ұйымдастырылған «Nomads cup» көшпенділер ойынына өңірдің 17 аудан-қаласынан 200-ге жуық спортшы қатысты. Жалпы жүлде қоры 2 млн теңге болатын сайыста жастар жамбы ату, қазақ күресі, аударыспақ, көкпар, арқан тартыс бойынша күш сынасты. Тартысты өткен жарыс қорытындысында командалық есеп бойынша І орынды Төлеби ауданының спортшылары жеңіп алса, ІІ орынды Бәйдібек ауданының жастары иеленді. Ал ІІІ орынға Арыс қаласының қатысушылары көтерілді. Жеңімпаздар мен жүлдегерлерге қаржылай сыйақылар, кубоктер мен дипломдар табыс етілді. Сондай-ақ қатысқан әрбір командаға 50 мың теңге көлемінде ақшалай сыйлық үлестірілді. Бұдан бөлек, әр сайыста үздік нәтиже көрсеткен 5 қатысушыға және ең жас спортшыға арнайы сыйлық табыс етілді.
Айта кетейік, жастар арасында қазақ халқының ұлттық ойындарының мәнін, дала дәстүрін, ұрпақтар сабақтастығын негізге ала отырып, ел тарихын, болмысын, дәстүрін насихаттау мақсатындағы игі іс-шара «Жастар ресурстық орталығы» КММ ұйымдастыруымен, Арыс қаласы әкімдігінің қолдауымен өтті.
Түркістан облысы
