Ұлттық спорт • 30 Қараша, 2023

Ат жалындағы айқас

184 рет
көрсетілді
3 мин
оқу үшін

Жал-құйрығы таралған сәйгүлікті баптаумен қа­тар, оның құлағында ой­науға құмар жастар қа­тары жылдан-жылға көбейіп келеді. Талғар ауданындағы «Байсерке Агро» холдингінің «Қо­быланды» атшабарында жастар арасында өткен облыстық чемпионат осы пікіріміздің дәлелі дер едік.

Ат жалындағы айқас

Аталған додаға Алматы облысының 7 ауданынан 100-ге жуық спортшы жас­тар қа­­тысып, ұлттық ат спор­ты­ның аударыспақ, жамбы ату, көк­­пар тарту, теңге ілу түр­лері бойынша өзара сынға түсті. Бұл дүбірлі жарыс­ты та­­қымдағы жүйрік те түйсін­ген­дей, ауыздықпен алыса, буы бұрқырап, сәт сайын адымы ашыла берді.

Ұлттық ат спортын та­ма­шалауға келген жан­күйер­лердің де делебесі қозып, қиқуға қиқу қосты. Көмбені айналған көкпаршылардың епті қимылы олардың жас та болса ширыққан шымыр екендіктерін аңғартты. Қазандыққа салым салуға ұм­тылған командалар арасында Талғар ауданының жүректі де білекті көкпаршыларының шебер­ліктерінде шек болмады. Тартысты ойын нәтижесінде олар ешкімге дес берместен, 1-орын алды.

Ал жарысқа екі-үш қыр асып келген Кеген мен Ра­йым­бек ауда­ны­ның көкпар­шылар командасы да мық­тылықтарын дәлелдей келе, жүлделі 2 және 3-орындарды қанжығаларына байлады.

Облыстық чемпионатта ауда­рыспақ ойыны да өз дәре­жесінде өтті. Бұл бәсекеде 9 салмақ дәрежесінде жеңім­паз­дар анықталды. Олардың көш­басында Райымбек ауда­нының апайтөс балуандары теңдессіз өнер көрсетіп, кө­рер­мендер қошеметін иеленді. Таулы өңір­дің намысын қорғаған Талау Досжан, Тоқ­тарғазы Құрмет, Алмас Тө­кенұлы, Абылжан Әділет, Елжас Шерхан, Нұрғайып Ер­алы, Әбітай Сұңғат есімді ба­луандарға ешкім тең кел­меді. Соның арқасында олар ат теңселген аударыспақ ойы­нының бас жүлдесін еш қиын­дықсыз жеңіп алды.

Ат құлағында ойнаған спорт­шылардың нысана көздеудегі дәл­дігі мен ептілігі жамбы атудың хас шебері екендіктерін көрсетті. Жарыстың бұл түрінде Еңбекшіқазақ ауданының спорт­шысы Ерболат Нарұлы қарсыластарынан қара үзіп, жеңімпаз атанды. 2-орынға Қа­расай ауданының намысын қорғаушы Нұрсұлтан Бір­лік­баев табан тіресе, 3-орынды Ең­бек­шіқазақ ауданының спорт­шысы Мадияр Шәріпбай ие­ленді.

Теңге ілуде де спортшы жас­тар ептіліктің үлгісін көрсетті. Құстай ұшқан жүйріктің бауырына іліне, теңге түйілген орамалды іліп әкетудегі ше­берліктері көпшілікті тәнті ет­ті. Ат спортының бұл түрі бо­­­­йын­­ша да Еңбекшіқазақ ауда­­­нының командасы оқ бойы озық шықты.

Облыстық чемпионатта жалпыкомандалық есеп бойынша Райымбек ауданы 1-орынға, Еңбекшіқазақ ауданының спорт­шылары 2-орынға тұрақ­таса, Кеген ауданының ко­ман­­дасы 3-орынды иеленді. «Ата­дан балаға мирас болған ұлт­тық ат спорты – желкілдей өскен жастарды төзімділік пен ептілікке, шымыр болуға, ең бастысы, отаншылдыққа тәр­биелейді. Бүгінгі чемпионатты ұйымдастырудағы мақсат – алдағы республикалық, халық­аралық жарыстарға қатысатын ұлттық құраманың құрамын айқындап, шын мықтыларды іріктеу», дейді Алматы облыс­тық жастар құрамасының бас бапкері Дербіс Байділдаев.

 

Алматы облысы