Коллажды жасаған – Қонысбай ШЕЖІМБАЙ, «EQ»
«Қазпошта» АҚ Түркістан облыстық филиал директоры Азат Ильясовтің айтуынша, географиялық енудің ең жоғары деңгейіне ие мекемеде 1 155-тен аса қызметкер жұмыс істейді. Өңірде 14 аудандық пошта байланыс торабы – 306, оның ішінде 237 ауылдық, 59 қалалық бөлімше, 10 серіктестік нүкте бар. Сондай-ақ барлық бөлімшеде пошталық, логистикалық, қаржылық, агенттік, электрондық қызметтер ұсынылады. Әр аудан, ауыл тұрғыны өзіне қажетті тауарды жақын «Қазпошта» бөлімшесінен, сәлемдемелер супермаркетінен немесе «Есіктен есікке» курьер арқылы мекенжайына жеткізіп беру қызмет түрін пайдалана алады.
«Биыл 8 айдың қорытындысында «Қазпошта» АҚ-тың электронды коммерцияны және қаржылық қызметтерді дамытуы есебінен, сонымен қатар шығындарды оңтайландырудың нәтижесінде табысты мекемеге айналып, былтырғы мен салыстырғанда 44 пайызға немесе 16,7 млрд теңгеге артты. «Қазпошта» өз фулфилмент орталықтарын дамытып, отандық және шетелдік танымал маркетплейстер үшін тапсырыстар беру бекеттерін ашып, қоймалар мен поштамат желілерін кеңейту жұмыстарын жүргізіп жатыр. Сол жобалардың бірі – шетелдік танымал маркетплейстерден клиенттеріміздің тапсырыстарын беруге қолайлы болу үшін 2023 жылдың 1 қарашасында Qazpost Keruen жаңа сервисіміз іске қосылды. Америкалық және еуропалық танымал онлайн дүкендер елімізге өз тауарларын жеткізіп бере алмайды, сол себепті бұл қызметті қосу қолға алынды. Себебі халықтың басым бөлігі Қытай, АҚШ, Еуропадан келетін тауарларына көп сұраныс жасайды. Сондықтан «Қазпошта» осы сұраныстарды ескере отырып, тапсырыстарды ресімдеудің ыңғайлылығымен, қолжетімді бағада тауарлардың еліміздің кез келген нүктесіне тез жеткізуін әрі жөнелтуін жүзеге асырады. Биыл қызметкерлерімізге 30 жылдық мерейтой аясында тұңғыш рет Президент Қасым-Жомарт Тоқаевтың атынан мемлекеттік наградалар табыс етілді. Оның ішінде Төлеби аудандық пошта байланыс торабында 41 жыл бойы адал еңбек етіп келе жатқан Забайра Ұлтанбаева «Құрмет» орденімен марапатталды. Сонымен қатар Шардара ауданы пошта байланыс торабында 42 жыл қызмет атқарып келген пошта байланыс торабы бастығының орынбасары Айша Акимбекова Цифрлық даму, инновациялар және аэроғарыш өнеркәсібі министрі Бағдат Мусиннің қолынан «Еңбек ардагері» медалін алды. Бірқатар қызметкеріміз пошта саласының әлеуметтік-экономикалық дамуына қосқан елеулі үлесі үшін облыс әкімінің Алғысхаты және грамотасымен марапатталды», дейді А.Ильясов.
«Қазпошта» халыққа сапалы қызметті көрсету үшін брондалған автотехникаларын алып, инфрақұрылымдарды қалпына келтірген. Мултимодальды қоймалармен логистикалық және сауда хабын салуға өңірлерде облыс әкімдігінің қолдауымен жер учаскесі бөлініп, меморандумға қол қойылған. Сондай-ақ «Қазпошта» мемлекеттік-әлеуметтік қызметтер көрсету үшін ауылдық пошта бөлімшелерін көпфункционалды қызмет көрсету орталықтарына айналдырмақ. Яғни тиісті министрліктің қолдауымен «Азаматтарға арналған үкімет» мемлекеттік корпорациясының қызмет түрін ауыл тұрғындары пошта бөлімшелерінен алады.
Түркістан облысы