Қоғам • 04 Желтоқсан, 2023

Астанада өртенген көліктің жүргізушісін әскери қызметкер құтқарып қалған

689 рет
көрсетілді
1 мин
оқу үшін

Астанада әскери қызметкер өртеніп жатқан көліктің жүргізушісін құтқарып қалған, деп хабарлайды Egemen.kz.

Астанада өртенген көліктің жүргізушісін әскери қызметкер құтқарып қалған

Әлеуметтік желіде өртеніп жатқан көліктің ішіндегі адамды құтқарған ер адамның видеосы тарады. Аталған оқиға 2023 жылы 3 желтоқсанда Астана қаласында болғаны анықталды. Жүргізушіні құтқарған әскери қызметкер екені белгілі болды.

Қорғаныс министрлігі баспасөз қызметінің мәліметінше, видеодағы әскери қызметші - Мейрамбек Ысқақов взвод сержанты, 68665 әскери бөлімінің жауынгерлік және дене шынықтыру нұсқаушысы.

"2023 жылдың 3 желтоқсанында кешкі уақытта Мейрамбек Ысқақов дүкенге шыққан. Жанып жатқан автокөлікті көрген әскери қызметші оқиға туралы елордадағы Төтенше жағдайлар департаментінің 101 орталығына шұғыл хабарлайды. Дереу қимылдаған әскери қызметші жанып жатқан көліктің ішінде адам бар екенін аңғарып, оны қауіпсіз жерге алып шығады. Бұл уақытта ер адам есінен танып қалады. Алғашқы медициналық көмек көрсеткен Мейрамбек азаматты оқиға орнынан келген жедел жәрдем қызметкерлеріне тапсырады. Жүргізуші № 1 қалалық ауруханаға жеткізілді", – дейді ведомствоның баспасөз қызметі.

Айта кетейік, әскери қызметшінің әрекетіне өтіп бара жатқан азаматтардың бірі де ат салысыпты.

 "Жоғары қолбасшылық әскери қызметшіні марапатқа ұсынды. Әскери қызметші Мейрамбек Ысқақов жұбайы екеуі Самира және Лунара есімді қыздарды тәрбиелеп өсіріп отыр", – делінген хабарламада.