Бұл 15 мыңдай тұрғыны бар Жәнібек ауданы үшін ақ түйенің қарны жарылғандай ақжолтай хабар! Өйткені облыс орталығынан 500 км шалғай жатқан аудан өмір бойы жол азабын тартып келе жатқан еді. Әсіресе көктем мен күзгі лайсаңда жолаушылар батпаққа батып, ара қонып жететін. «Жол азабы – көр азабы» деген мақал да дәл осы Бөкей ордасы мен Жәнібек ауданы халқы үшін айтылғандай.
Жаңа жолдың тарихы 2018 жылдан басталады. Сол кездегі мемлекет басшысының өңірге сапары кезінде Жәнібек пен Бөкей ордасына баратын автомобиль жолын күрделі жөндеуді тапсырған. Бұл 245 шақырымдық жол еді. Соның 99 шақырымы Жәнібек ауданы аумағымен өтетін. Жобалау-есептеу құжаттары дайын болған соң жол құрылысы 2019 жылы басталып та кетті. Әуеліде «2022 жылы бітіреміз» деген жол құрылысы түрлі кедергіге тап болды. Қазақстанның қиыр шетінде құрылыс материалдары тапшы болды. Оны жеткізу де оңай болмады. Араға пандемия килікті. Кейбір мердігер өз ісіне жауапсыз қарап, сотқа тартылды. Осылайша, ауыл халқы алаңдай бастап еді. Алаңдамағанда қайтсін, 2019-2022 жылдары – 4 жыл ішінде небәрі 124,6 шақырым жолға асфальтбетон төселді.
Көпшілік көптен күткен жолға жан біткені биыл ғана. Өткен жылдың соңында облыс басшылығына Нариман Төреғалиев келгенде, оңтүстік аудандарға апаратын осы жолды ерекше бақылауға алатынын айтқан еді. Сол күннен бері осы құрылысты көзімен көріп, жеке бақылау үшін 8 мәрте келіп кетіпті.
«Мен осы жерге соңғы келгенімде көпір құрылысы баяу еді. Сондықтан мердігер компания басшысымен сөйлесіп, жұмысты барынша жеделдетуді тапсырдым. Өйткені негізгі жолдың қатқыл табаны салынғанымен, көпір дайын болмаса, халық айналып жүрем деп қиындық көрер еді. «Uniserv» компаниясына рахмет, көпір құрылысын аяқтады. Енді Жәнібек ауданы жолаушылары жол бейнетін көрмейді, айналма жолға түспейді» дейді Батыс Қазақстан облысының әкімі Нариман Төреғалиев.
Иә, расында да биыл бір жылда алдыңғы үш жылдың көлеміндей іс атқарылғаны рас. 1 желтоқсан күні Жәнібек ауданы аумағындағы жолдың төменгі қабаты толықтай асфальтталып бітті. Қалып тұрғаны соңғы нысан, 72-шақырымдағы көпірдің құрылысы еді. Міне, Жәнібек ауданы тұрғындары үшін, облыс үшін үлкен тарихи сәт, айтулы күн жетті. Жаңа көпірдің құрылысы аяқталып, Жәнібек-Орал бағытындағы жол пайдалануға беріліп жатыр.
«Бұл – біздің аудан тұрғындары үшін үлкен қуаныш. Барша жәнібектіктер атынан Нариман Төреғалиұлына алғысымызды жеткіземіз», дейді аудан басшысы Тимур Шыниязов.
Тимур Серікұлының айтуынша, Жәнібек ауданында аудандық маңызы бар автомобиль жолдарының жалпы ұзындығы 260 шақырымды құрайды. Соның 30 шақырымы 2022 жылы жөнделген. Ал биыл аудандық маңызы бар жолдарға 40,5 шақырым асфальт төселінген. Осылайша, жалпы жөнделген жолдың ұзындығы 70,5 шақырым болған.
Атап айтсақ, «Жәнібек – Талов – Кіші Өзен» автомобиль жолының 27-33 және 33-48 шақырым аралығы орташа жөнделген. Қамысты ауылына кіреберіс 14,8 шақырым жол күрделі жөндеуден өтті. Ақоба ауылына кіреберіс жолдың 5,6 шақырымына асфальт төселді.
Аудан басшысының айтуынша, келер жылы «Жәнібек – Талов – Кіші Өзен» автомобиль жолының 92-128 шақырымы, Борсы ауылы жолының 1 шақырымы, Тау ауылына кіреберіс 5,7 шақырым жолдар салына бастайды.
Аудан орталығындағы ауылішілік жолдарда да қарқынды жұмыстар жүріп жатыр. Биыл екі көшеге жалпы ұзындығы 4 шақырым жол төселген. Келер жылы 4 көшеде жалпы ұзындығы 5,6 шақырым ауылішілік жол салынбақ. Осы жұмыстардың нәтижесінде аудан орталығындағы көшелердің 63%-ы асфальтталатын болады.
«Жол қатынасының жақсаруы жолаушылар тасымалының дамуына жағдай жасауда. Әлеуметтік маңызы бар №136 «Орал – Жәнібек», «Жәнібек – Орал» маршруты күн сайын тұрақты жүріп тұр. Қазіргі кезде «Қамысты – Тау – Орал» маршрутын іске қосу жұмыстарын жүргізудеміз», дейді аудан әкімі Тимур Шыниязов.
Батыс Қазақстан облысы
