Аймақтар • 13 Желтоқсан, 2023

Бәріне кінәлі қабыршақ мұз

112 рет
көрсетілді
5 мин
оқу үшін

Коммуналдық сала өкілдерінің сыналар шағы басталды. Атырауда ауа температурасы күрт төмендеп еді, сумен қамту мәселесінен ши шыға жаздады. Дәлірек айтқанда, тұрғындар бір тәулікке жуық сусыз отырды.

Бәріне кінәлі қабыршақ мұз

«Атырау облысы су арнасы» КМК-ның баспасөз қызметінен мәлім еткендей, бұған Жайық өзенінде қабыршақ мұз қатып, су соратын стансалардың жұмысына кедергі келтірген. Сол себептен, 9 желтоқсанда жергілікті уа­қыт­пен сағат 23:30 шамасында су беру тоқ­татылған.

«Ауа райының күрт салқын­да­уынан Жайық өзенінде мұз қатып, ағыс жылдамдығы төмен­де­ді. Осыған байланысты Атырау қаласының су тазарту кешеніне су беру тоқтатылды. Ал 10 жел­тоқ­сан­да таңғы сағат 4:30-да қа­ладағы желілерге төтенше жағдайларды болдырмау үшін төмен қысыммен су берілді. «Атырау-Мақат» магис­тралдық құбырымен, оның ішінде «Береке» шағын ауданындағы тоғыз қабатты үйлерге, Көктем, Жұлдыз-3, Теңдік, Ақсай-1, Ақсай-2 шағын аудандарына техникалық себептерге байланысты су жібе­ріл­меді», деп ақпарат таратты кәсіп­орын­ның баспасөз қызметінен.

Сусыз отыру кімге оңай дейсіз? Әлеуметтік желідегі парақшалар мен WhatsApp мессенджеріндегі чаттар тұрғындардың ренішін білдірген пікіріне толды. Ел-жұрт­тың базынасы қалалық, об­лыс­тық әкімдіктерге жеткені дау­сыз. Облыс әкімдігінде қалып­тас­қан жағдайға байланысты арнайы комиссия құрылды. Комис­сия­ға жетекшілік еткен облыс әкі­мінің орынбасары Қайрат Нұртаев пен Атырау қаласының әкімінің Шәкір Кейкин Жайық өзенінен су соратын, тазалайтын стансалардың жұмысын қалпына келтіруді қадағалады.

Бірақ мәселенің оң шешімі оңай­лықпен табыла қойған жоқ. Өйткені 10 желтоқсанда жергілікті уақытпен сағат 15:00-ге дейін екі су тазарту қондырғысы мұздан тазартылып, іске қосылған. Сол кезде сүңгуірлер үшінші су тазарту қондырғысын мұздан тазалауды жалғастырып жатты. Ауа райының құбылысын қалт жібермейтін «Қазгидромет» РМК Атырау облыстық филиалының мәліметіне сүйенсек, соңғы аптада шығыстан екпінді жел соғып, Каспий теңізінің деңгейі 40 см-ге төмендеген. Бұл Жайық өзенінде де су деңгейінің төмендеуіне әсер еткен.

Ал «Атырау облысы су арнасы» КМК су тазарту қон­дыр­ғыларының басшысы Борис Пенкиннің айтуынша, Жайық өзенінде қабыршақ мұздың тығыз массасы пайда болған. Мұн­дай құбылыс шамамен 20 жыл­дан бері байқал­ма­ған.

«Биыл, тіпті соңғы аптада Жа­йық өзеніндегі су деңгейінің күрт төмендегені байқалды. Мә­се­лен, 9 желтоқсанда кешкі бір­неше сағатта су деңгейі 15-20 см-ге тө­мен­деді. Күн күрт суытып, өзен бе­тін­дегі ұсақ мұз кристалы су жи­найтын жабдыққа орнатылған қорғаныс торларын бітеп тастады», деп мәлім етті Борис Пенкин.

Мамандар қабыршақ мұз өзен­нен су алуға кедергі кел­тіре­тін бірнеше себепті туын­да­та­тынын алға тартып отыр. Бірін­шіден, су жинайтын құ­ры­ғы­лар біте­леді. Өйт­ке­ні ұсақ мұз крис­талы балық қорғау торларын, су жинайтын жабдықтың басқа эле­менттерін бітеп тастауы мүм­кін. Бұл су жинаудың тиім­ді­лі­гін төмен­детеді.

Екіншіден, жабдықтың бұ­зылуына ықпал етеді. Өзендегі су ағы­сымен қабыршақ мұз жеңіл қозғалады. Әсіресе мұз кристалдары үлкен болса, немесе тығыз жинақталса, су алатын жабдыққа механикалық зақым кел­тіреді.

Үшіншіден, мұндай факторлар су сапасын төмендетеді. Мұзбен бірге әртүрлі ластаушы заттар жүруі мүмкін.

Төртіншіден, су ағысына ке­дер­гі келтіреді. Кейбір жағ­дай­да қабыршақты мұз судың қалыпты ағы­сына кедергі келтіретін тығыз клас­терлер түзуі мүмкін. Ал бұл су жинайтын құрылғылардың тиімділігіне кері әсер етеді.

Бұл себептердің қаншалықты әсері еткені белгісіз, 10 жел­тоқ­санда кешке дейін сумен қамту мәселесі ушығып тұрды. «Аты­рау облысы су арнасы» ком­му­нал­дық мемлекеттік кәсіпор­нының басшысы Мейірім Қалауи­дің айтуынша, сол күні жер­­гілікті уақытпен сағат 16:00 шамасында тұтынушыларға су беріле бастаған. Ал сағат 19:00-де құбырдағы қысымды қалпына келтіру аяқталған.

«Су тазарту қондырғыларын жөндеу, тазарту жұмыстары 9 желтоқсан күні кешке басталды. Кәсіпорынның жұмысшылары мен арнайы мекеменің сүңгуір­лері ауа райының қолай­сыз­ды­ғы­на қарамастан үзіліссіз жұмыс істеді. Олар барлық су тазарту қон­дыр­ғы­сын мұздан толық тазартты. Қазір кәсіпорынның су тарту құрылғылары штаттық режімде жұмыс істеп тұр. Судың құрамы тазарған сайын құбыр­дағы қысым артады», дейді М.Қалауи.

 

Атырау облысы