Қоғам • 13 Желтоқсан, 2023

49 жастағы студент

168 рет
көрсетілді
2 мин
оқу үшін

49 жастағы Нұрбай Матсалаев қазір автосервисте жұмыс істейді. Биыл көптен бері ішке бүккен арманын жүзеге асырып, қайтадан студент боламын деп шешкен. Сөйтіп, Ақтөбедегі Heriot-Watt University-ға оқуға түсіпті.

49 жастағы студент

Ол басқа талапкерлер сияқты оқуға түсуге мұқият дайын­дал­ған. ҰБТ және тілдік емтихан тапсырып, Ұлыбритания уни­верситетінің филиалында оқу­да­ғы алғашқы жетістіктеріне жет­кен.

– Оқу туралы ой екі-үш жыл­ бұрын пайда болды. Ме­нің жеке кә­сібім бар. Жұ­мы­сым – элект­ронды автомобиль жүйе­лерін диаг­­ностика­лау. Орта тех­никалық бі­лім бар, бірақ ком­­пью­терлік бағ­дарламалау сала­­сын­­дағы бі­лі­мімді арт­тыр­ғым келеді. Сон­­дықтан «Компью­тер­лік ин­­женерия» ма­ман­дығын таңдадым. Енді жұ­мыс­ты оқу­мен біріктіруім керек. Бұл оңай емес, бірақ қала­са­ңыз, бәрі мүм­кін, – дейді Н.Матсалаев.

Ол осыған дейін ағылшын тілін мүлдем оқымапты. Бірақ жұмысының ерекшелігіне байланысты ағылшын тіліндегі құ­­жат­тармен көп жұмыс істе­уі­не тура келген. Содан бастап бар­лық ақпаратты тек ағыл­­шын ті­лін­де оқи бастаған. Оның осы жасқа келгенде оқуға құш­тар­лығын ашқан – зайыбы. Әйе­лі­нің арқасында өз күшін сынап, әлемдік университетке тү­су­ге барын салған. Нұрбайдың зайы­бы­ – Қ.Жұбанов университетінің экономика факультетінде оқы­ту­шы. Ол оқуға түсерде ағайынның көз­қарасы әртүрлі болыпты. Аға буын қабылдай алмай, жастар жағы қолдаған. Ол қанша жасқа келсе де, оқимын деген адамға ойланудың қажеті жоқ деп санайды.

– Мен тілдік емтиханның қиын болатынын түсіндім, сон­дық­­тан оқуға түсу қарсаңында ағылшын тілінен репетитор жалдап, қарқынды дайындала бастадым. Ең алдымен, Шотландия университетінің 200 жылдық та­рихы қызықтырды. Қазір осыны зерттеп жүрмін. Содан кейін университеттің ашы­­лу жо­ба­сы­ның ауқымы таңғал­ды­ра­ды.  Осы­лай­ша, әлемдегі ең үздік жо­ға­ры оқу орындарының бі­рін­де оқуға мүм­кін­дік алдым. Арман­дар Heriot-Watt-пен орындалады, – дейді студент.

Естеріңізге сала кетейік, Ұлы­бри­танияның ең көне жоғары оқу орны – Heriot-Watt филиалы биыл Ақтөбедегі Қ.Жұбанов университеті базасында ашылған болатын. Негізінен Heriot-Watt ин­женерлік кадрлар мен IT мамандар даярлайды. Heriot-Watt филиалының дипломы шетелде тізімделеді. Студенттер әр жылы әр филиалға барып оқиды. Мысалы, оқудың бірінші курсы Ақтөбеде, екінші курсы Шот­ландияда өтеді. Студенттер Қ.Жұ­ба­нов университеті арқылы He­riot-Watt-қа түседі, олардың екі бағ­дарламасы және екі дипломы болады.