Байқау • 14 Желтоқсан, 2023

Ісмерлер өнерімен жарысты

123 рет
көрсетілді
2 мин
оқу үшін

Ұрпақ тәрбиесі – таусылмайтын тақырып. Күнделікті күйбең тір­шіліктен де баланың үйре­нері көп. «Ұяда не көрсең, ұшқанда соны ілерсің» деген да­налықтың түп-төркіні осы ойымызды айқындай түсері анық.

Ісмерлер өнерімен жарысты

Атадан балаға мұра – ата­кәсіп, салт-дәстүрімізді жаң­ғыртудың хас шебері атанып жүрген ақ самайлы қариялар мен ақ жаулықты аналардың қатысуымен Кеген аудандық мәдениет үйінде «Атам, әжем және мен» атты тағлымы мол байқау өтті. Аудандық ішкі саясат бөлімі, аудандық аналар кеңесі және «Шолпан» ресурстық орталығы қоғамдық қоры» ұйытқы болған іс-шараны өткізудегі басты мақсат – отбасының ынтымақ-бірлігін, ұрпақтар сабақтастығын, өне­гелі тәжірибесін үлгі етіп, насихаттау.

Мағынасы зор бұл байқауға 12 ауылдық округтен өмірден көрген-түйгені мол өнегелі аталар мен әже­лер н­еме­ре-шөберелерімен қаты­­суға ниет білдіріп, белсене атса­лыс­қандығын айрықша атау абзал. Шебер әжелердің қи­ын­дыдан қиюластырған құ­рақ көрпе, зерлі кестелері мен ата­лардың ат әбзелдерінен бас­тап, балаларының қолынан шық­қан заманауи тұрмыстық бұйым­да­ры көрмеге қойылып, көп­тің қы­зығушылығын тудырды.

«Заманына қарай – адамы» деген. Осы күні қолына ине ұстап, іс тігетін келіндер қа­та­ры кеміп барады. Ескіні жа­ңар­ту, жоқтан бар жасай білу – үлкен өнер. Үйдегі бала-шаға, немерелеріме өткен күнді өсиет етіп айтып, ісмерлікпен қоса, май шайқап, құрт жасауға баулып отырамын. Бүгінгі байқаудан жас­тар түгілі өзімнің үйренерім көп екен. Біраз дүниені жадыма түйіп барамын. Осыны ұйымдастырған Шолпан Ілікқызына алғысымыз шексіз», – дейді Бөлексаз ауылынан келген ісмер әже Нұржамал Мәтілова.

Шеберлікті паш еткен бай­қау барысында қолөнер бұйымдары сарапқа салынып, көр­меге қатысушылардың ең­бек­тері бағаланды. Әділ­қа­зылар қорытындысы бойынша 1-орынды Бөлексаз ауылдық округінен келген Қозыбаевтар отбасы иеленсе, 2-орын Та­са­шы ауылдық округінің тұр­ғыны Мейірмановтар отбасына бұ­йыр­ды. Ал жүлделі 3-орынды Қа­­ра­бұлақ ауылдық окру­гінен қатысқан Ұзақовтар еншіледі.

Сондай-ақ жыл бойы қо­ғамдық істерде белсенділік та­нытқан аналарға арнайы сый­лықтар табыс етілді. Байқау соңы әсем ән, күмбірлеген күй­мен қорытындыланды.

 

Алматы облысы