Үкімет • 19 Желтоқсан, 2023

Бір жылда 165 мектеп пайдалануға берілді – Үкімет

162 рет
көрсетілді
2 мин
оқу үшін

Мемлекет басшысының барлық деңгейдегі білім беру саласын нығайту жөніндегі бірқатар маңызды бастамалары іске асырылып келеді. Биыл елімізде 137 мың оқушыға арналған 165 мектеп пайдалануға берілді, деп хабарлайды Egemen.kz Үкіметтің баспасөз қызметіне сілтеме жасап.  

Бір жылда 165 мектеп пайдалануға берілді – Үкімет

Фото: primeminister.kz

«Осылайша, 12 апатты жағдайдағы және үш ауысымда оқытатын 29 мектеп бойынша мәселе шешілді. 210 мектепте күрделі жөндеу жұмыстары аяқталды. «Жайлы мектеп» ұлттық жобасы аясында 461 мың оқушыға арналған екі ауысымда оқытатын 217 мектептің құрылысы басталды. Білім беру инфрақұрылымын қолдау қоры құрылған сәттен бастап арнайы шотқа 151,9 млрд теңге түсті. Нәтижесінде жалпы сомасы 96,5 млрд теңгеге 76,7 мың оқушыға арналған 62 мектептің құрылысы қаржыландырылды. Биылғы 1 желтоқсандағы жағдай бойынша 28,6 мың оқушыға арналған 17 мектеп пайдалануға берілді. 1 қыркүйектен бастап 1,6 млн бала тегін ыстық тамақпен қамтылды. Биылғы қаңтар айында мұғалімдердің жалақысы тағы 25%-ға өсті. Қыркүйек айынан бастап 98 мыңға жуық тәрбиешінің жалақысы 30%-ға артты. 2023 жылы жоғары және жоғары оқу орнынан кейінгі білімі бар кадрларды даярлауға 88 мыңнан астам грант бөлінді. 1 қыркүйектен бастап студенттердің шәкіртақысы 20%-ға өсіп, 41 898 теңгеге (педагогикалық ғылымдар – 67 200 теңгеге) жетті, магистранттар мен докторанттар шәкіртақылары 15%-ға өсіп, тиісінше 97 024 және 217 500 теңгеге көтерілді. Колледж студенттерінің стипендиясы 50%-ға көтерілді. Биыл 5,9 мың орынға арналған 25 студенттер жатақханасы пайдалануға берілді. Жыл соңына дейін 5 мың орындық тағы 19 жатақхана ашу жоспарланып отыр», делінген ақпаратта.

Елімізде шетелдік жетекші жоғары оқу орындарының филиалын ашу ісі де қарқынды жүргізіліп келеді.