Қаржы • 28 Желтоқсан, 2023

Қаржы орталығының сенімді жұмысы

132 рет
көрсетілді
4 мин
оқу үшін

Жақында «Астана» халықаралық қаржы орталығы 2023 жылдың қызметтік қорытындысын жариялады. Қазіргі таңда орталық Орталық Азия мен Шығыс Еуропа (Global Financial Centres Index рейтингіне сәйкес) аймағында өзінің көшбасшылығын сақтап, бизнес ашу, іскерлік орта құру, инвестициялар тарту бойынша алда келе жатыр. Сонымен қатар адами капиталды дамытуға тиісті және қолайлы құқықтық реттеуші ортаны құрып, дамыған инфрақұрылымын жасай алды.

Қаржы орталығының сенімді жұмысы

«Қазірдің өзінде біздің орталық арқылы ел экономикасына 10,9 млрд доллардан астам қаражат, оның ішінде AIX биржасы арқылы – 4,6 млрд және қатысушылардан 6,3 млрд инвестиция тартылды. Осылайша, орталықтың 2025 жылға дейінгі даму стратегиясында қойылған міндет орындалды. Орта­мерзімді келешекте біз инфрақұрылымды дамытуды жалғастырамыз және нарыққа көміртегі квотасы мен тұрақты қаржы­ландыру сияқты сұранысқа ие құралдарды ұсынатын боламыз», дейді «Астана» халықаралық қаржы орталығының басшысы Ренат Бектұров.

Биыл АХҚО-да 600-ден астам жаңа қатысушы компаниялар тіркелген. Олар­дың жалпы саны әлемнің 78 елінен 2 300-ден астам компанияны құрайды. Қаржы орталығы қызметінің барлық кезеңінде АХҚО қатысушылары ел бюджетіне 68,5 млрд теңге көлемінде салық төлеп үлгеріпті. Әсіресе көлік, логистика, агроөнеркәсіптік және өндіруші кешендер, жаңартылатын энергия көздері (ЖЭК), IT сияқты бағыттар едәуір жақсы дамыған. Орта дәліз жобасы бойынша «ҚазМұнайГаз» еншілес құрылымы Аbu Dhabi Ports Group-пен бірлесіп АХҚО-да Caspian Integrated Maritime Solutions бірлескен кәсіпорнын тіркеді. Екі ірі танкер Ақтау портына келді. ҚТЖ Грузия мен Әзербайжанның ұлттық компанияларымен бірлесіп Орта дәліздің құрлықтағы жобаларына инвестиция салу үшін ортақ кәсіпорын құрды. AIX-те қарыз құралдары нарығы оның 56 листингі арқылы рекордтық өсуді көрсетеді.

Тартылған капиталы биыл 1,95 млрд дол­лардан асатын 7 үлестік құрал орна­лас­­тырылған. Оның арасында AIX ресми ті­зі­міне «KEGOC» АҚ акциялары енгі­зіл­ді.­ Осы жылы отандық және еуропалық 14 бро­кер мен кастодиан AIX мүшелері атан­ған.

«Aстана» халықаралық биржасында сауда-саттық көлемі өткен жылы 173 миллион долларды құраса, осы жылы 510 миллион долларды көрсетіп отыр. AIX орталық депозитарийіндегі жеке шот­тар­дың саны 1,5 млн-нан асып, қараша айын­да биржадағы сауда-саттықтың 61 па­­йызы шетелдік инвесторлар тарапы­нан жасалған. Соңғы кездері активтер мен қорларды басқару секторына қызы­ғу­шылық артуына байланысты АХҚО бас­қаруындағы активтер көлемі 82%-ға өсіп, бүгінде 1 миллиард долларды құрап отыр.

Қазіргі кезде тіркелген қорлардың саны жыл ішінде 20-дан 37-ге дейін ұлғайды. Ал басқарудағы инвестициялық қорлар активтерінің көлемі 616 млн долларға жетті.

Инвестицияларды тартуға жәрдем­десу үшін АХҚО еліміздің қаржы нары­ғында бұрын болмаған жаңа өнімдер мен қызметтерді дамытуды жалғастыруда. Мәселен, былтырғы жылдан бергі деректер бойынша АХҚО криптобиржаларының отандық банктермен өзара әрекеті жөнін­дегі қанат­қақты жоба аясындағы транзакциялар көлемі шамамен 220 мил­лион долларды құрайды. Тек сауда-сат­тық өткен жылмен салыстырғанда 104 есе өсіп, 217 млн доллардан асыпты. Клиенттер саны 6,7 есе ұлғайып, тұтынушы саны 41 384 жетті.

АХҚО краудфандингтік платформалары жалпы сомасы 35 млн доллар болатын 300-ден астам жоба­ны қаржыландырған. Биылдың өзінде 14,3 млн долларға 150 жоба қаржыландырыпты. Оның арасында IT, құрылыс, сауда, ауыл шаруашылығы, қызметтер, өндіріс және машина жасау сияқты салалар бар. Қаржы қызметтерін реттеу жөніндегі комитеті АХҚО-да қаржылық қызметтер көрсететін 20 компанияға рұқсат беріп, 7 ASP кеңесшісі (көмекші қызметтерді жеткізушілер) тіркелді. Мұндай компаниялардың жалпы саны 116-ға жетіп отыр.