Көшпелілер ойындары 2014 жылдан бері үздіксіз ұйымдастырылып келді. Алғашқы үш бәсекенің шымылдығы Қырғызстанда түрілді. «Айыр қалпақты» ағайындарымыз оны жоғары деңгейді өткізуге барынша күш салды. Уақыт озған сайын аталған жарыстың беделі мен мәртебесі өсіп, көрермендер саны күрт артты. Соған сәйкес, қатысушы командалардың қатары да көбейе түсті. Бір сөзбен айтсақ, бұл ойындар этно- спорттың Олимпиадасына айналды. Екі жылда бір өтетін осы спорттық сайысты 2022 жылы Түркияның ежелгі Изник қаласы қабылдады. Анадолы елінде Қазақстан құрамасы өте жақсы көрсеткішке қол жеткізді. Ал біздер үшін ең маңыздысы – Көшпелілер ойындарының бағдарламасына көкпардың енуі. Бұл өзгеріс «Көкпар» десе делебесі қозып, қаны қыз-қыз қайнайтын қазақ жанкүйерлерін қатты қуантты. Тұңғыш рет ұйымдастырылған жарыста біздің жігіттер қарсылас шақ келтірмей, жеңіс тұғырының ең биік сатысына көтерілді.
– V Көшпелілер ойындарының бағдарламасына спорттың 20 түрі еніп отыр. Бірқатар жарыс «Қазанат» атшабарында өтеді. Қазір Астана қаласының әкімдігі сол ипподромда күрделі жөндеу жұмыстарын жүргізіліп жатыр. Бұйыртса, ол таяу уақытта аяқталып қалар. Одан бөлек жекелеген күш сайыстары Жақсылық Үшкемпіров атындағы жекпе-жек сарайында, дәстүрлі интеллектуалдық ойындар «Думан» қонақүйінде, ал басқа бәсекелер «Алау» мұз айдыны мен «Qazaqstan» жеңіл
атлетика сарайында ұйымдастырылады. Дүбірлі доданың ашылу салтанаты «Астана арена» стадионында, ал жабылу рәсімі «Қазанатта» өтеді. Бәсекелер аяқталған бетте жалпы командалық есептің қорытындысын шығарамыз, – дейді Ұлттық және ат спорты түрлері орталығының директоры Бақдәулет Сәбитов.
Қазақстан құрамасы жарыс бағдарламасына енген барлық спорт түрі бойынша бақ сынайды. Басты мақсат – көпшілік көңілінен шығатындай нәтижелі өнер көрсетіп, жалпы командалық есепте жеке-дара көш бастау. Әсіресе біз көкпар, қазақ күресі, аударыспақ және жамбы ату сынды ата-бабаларымыздан кейінгі ұрпаққа мирас болып қалған ұлттық спорт түрлерінен өтетін сайыстарда толағай табысқа қол жеткізуге тиіспіз. Бұл күндері бас командамыздың сапында Сырым Ізбасаров, Ғалымжан Ізжанов, Ералхан Айкөз, Айтбек Сарыбай, Құрманбек Тұрғанбек, Әсел Далиева және тағы басқа мықтылар бар. Ең байтақ Қазақ елінің бас шаһарында өтетін дүбірлі додада сол дүлдүлдермен қатар, жарыс жолына шығатын басқа да саңлақтарға зор сенім артылып отыр.
– Қазақ қауымы үшін Көшпелілер ойындарының маңызы айрықша, – деп жалғастырды әңгімесін Бақдәулет Сәбитов. – Өйткені ұлттық өнеріміз ұлықталып, бүкіл әлем жұртшылығы назарына ілігетін тұсы осы. Аталған жарысқа Қазақстан құрамасы үздіксіз қатысып келе жатқаны өздеріңізге де мәлім. Көрсеткен нәтижеміз де көңіл көншітерлік. Тұңғыш рет ұйымдастырылған ойындарға 19 елдің спортшылары қатысса, 2022 жылы Түркияда өткен сайыста әлемнің 102 мемлекетінің дүлдүлдері бақ сынады. Демек жер жаһанның тең жартысы бұл сынға қызығушылық танытады деген сөз. Оның үстіне Астанадағы жарыстың жеңімпаздарына халықаралық дәрежедегі спорт шебері атағы беріледі. Бұл – спортшылар үшін үлкен мотивация! Бұған дейін ондай атақ берілмейтін. Осы тамаша дәстүр алдағы уақытта да жалғасын тауып, Көшпелілер ойындары ресми жарысқа айналса, ұлттық спортпен айналысатын жастардың саны да күрт артатыны айдан анық.
Қазіргі кезде барлық спорт түрі бойынша ұлттық құрама командалар жасақталды. Жерлестеріміз кемінде төрт-бес оқу-жаттығу жиынын өткізуді көздеп отыр. Арасында республикалық және халықаралық турнирлерге қатысу да жоспарланып отыр. Бір сөзбен айтсақ, елордада алауы тұтанатын V Көшпелілер ойындарына дайындығымыз өте жақсы. Енді Қазақ елінің өрендері осы керемет спорттық шараны аса жоғары деңгейде ұйымдастырып қана қоймай, барынша зор табысқа қол жеткізуге тиіс.
