Өнер • 04 Қаңтар, 2024

Италия көрерменінің көңілінен шықты

178 рет
көрсетілді
3 мин
оқу үшін

Иса Байзақов атын­да­ғы облыстық филар­мо­нияның симфониялық оркестрі жаңажылдық мейрам күндерінде Ита­лия жұртын қуан­тты. Музыканттар Ита­лия және Албания ор­кес­тр­лерімен бірге 7 қа­ла­да үлкен концерттер ұйым­дастырды.

Италия көрерменінің көңілінен шықты

Оңтүстік Еуропаның құй­қалы аумағында орын тепкен таулы Италияның халқы бұл күндері рождестволық қысқы демалыста жүр. Еуропа жұртына тән мәдени, рухани іс-шаралар бұл күндері жиілей түседі. Иса Байзақов атындағы Павлодар облыстық филармониясының симфониялық оркестрі елдер арасындағы мәдени байланыс аясында әрі халықаралық музыкалық тәжірибе алмасу мақсатында желтоқсанның соңғы онкүндігінде сапарын бастап кеткен. Шығармашылық гастроль бұл жолы аталған мемлекеттің шағын қалала­рында, атап айтқанда, Ка­пуа, Сорренто, Беневенто, Террачина, Перуджа, Тоди, Аге­ролла қалаларында жал­ғасып жатыр. Бұл жолы деп отыр­ғанымыз, оркестрдің мұн­дай кештері бұған дейін де сән-салтанаты жалғасқан елде ұйымдастырылған. 2017 жылы павлодарлық ұжым Рим, Ми­лан, Салерно және Аппенин түбегіндегі өзге де қалаларда сәтті өнер көрсетіп қайтқан.

па

– Халықаралық сапарымыз үлкен жобаның бірі болып отыр. Жерорта теңізі жа­ғалауында орын тепкен жеті қаланы аралап, концерт қою туралы ұсынысты өткен маусымда Италиядағы мәдениет пен музыка саласын дамытушы ұйымның президенті, профессор Леонардо Квадрини жасаған еді. Кәсіби тұрғыдан бұл біздің музыканттар үшін аса пайдалы. Бұл жерде симфонияның рухы ерекше сезіледі. Жергілікті және Албания елінің музыканттарымен бір оркестр құрамында өнер көрсетудеміз. Жергілікті көрермен арасында жастардың жиі бой көрсететіні қуантты. Италиялықтар өздерінің және неміс классикалық музы­касын айрықша ұнатады. Біз­дің оркестр И.Штраус, И.Брамс, Ж.Бизе, К.Сен-Санс, Рос­сини, Дж.Мартучидің туындыларымен қоса, Е.Рахма­диевтің «Дайрабайын» әр кон­цертте орындап жүр. Шығар­машылық ту­рымызды ұйымдас­тыруға мүм­кіндік тудырған Павлодар об­лысының әкімі Асайын Бай­­хановқа ризашы­лығымыз шексіз, – дейді Иса Бай­за­қов атындағы өңірлік филар­мо­нияның басшысы, Мә­дениет үздігі Амангелді Қо­жанов.

Филармония басшысы Жер­орта теңізі жағалауындағы ша­һарларда ауа райы жылы, күндіз 17 градусқа дейін көте­рілетінін айтады. «Теңіз­ден соқ­қан самал ерекше. Өкі­нішке қарай, сапар кес­тесінің тығыздығына байланысты қалаларды аралап кө­руге мүмкіндігіміз жоқ. Ита­лия­лықтар өте қызуқанды, шу­лы, дауыстап сөйлейтін ха­­лық екен. Өнерімізді ықы­лас­­пен қабылдап жатқандары бай­қалады. Кейде күніне 2 концерт беруге тура келеді», деп атап өтті ол.

Симфониялық оркестрдің көр­кемдік жетекшісі әрі ди­ри­жері, Қазақстанның еңбек сі­ңірген қай­раткері Болат Ра­хым­­жановтың сөзінше, жос­парланған 12 кон­­­церттің 8-і бү­гінде ұйым­дас­тырылған. Қал­ғаны 7 қаң­тарға дейін жалғасады.

 

Павлодар облысы