Кәсіпкер • 04 Қаңтар, 2024

Тоқтардың таңдауы

436 рет
көрсетілді
3 мин
оқу үшін

«Атамекен» ҰКП Атырау облыстық филиалы кәсіп бастағысы келетіндер арасында бірнеше жобаны іске асырып келеді. Сондай жобаның бірі – «Кәсіпке бағыт». Бұл жобаға қатысқан 57 адам үш ай білімін жетілдіріп, кейбірі өз ісін бастады.

Тоқтардың таңдауы

Махамбет ауданындағы Ең­бекші ауылының тұрғыны Тоқ­тар Төлегенұлы кәсібін ке­ңей­ту үшін 1 миллион 380 мың теңгенің грантына ие бол­ған. Ол бес жылдан бері бие ұстап, қымыз сатуды қолға алған.

«Қымызды дайындаудың қиындығы көп. Мұны осы істі кәсіп еткендер жақсы біле­ді. Грант қаржысына қы­мыз пісетін, күбі ыстайтын құрыл­ғылар, бір бие сатып алдым. Мәселен, бұрын сауылған бие сүтін күбіге құйып, қолмен кемінде 3-4 мың рет пісу керек еді. Сол кезде қымыз дайын­дау уақыты төрт сағатқа дейін созылатын. Ал автоматты кү­бі құрылғысын алғалы бері қы­мызды бір сағатта да­йындайтын болдым. Күбіні ыста­маса, қымыздың дәмі кел­мейді. Әр күбіні ыстауға біраз уақыт жұмсалады. Енді күбі ыстайтын пеш бар», дейді Тоқтар Төлегенұлы.

Қазір оның иелігінде 4 бие бар. Жыл сайын ауылдастарына, өзге де тұтынушыларға дертке дауа болар қымыз ұсы­на­ды. Саумалға сұраныс көп түседі. Бес жылдан бері Аты­рау, Құлсары, Ақтау қала­ла­рынан, шалғайдағы Құрман­ғазы ауданынан тұрақты тапсырыс берушілер бар.

Тоқтар Төлегенұлы қы­мыз­­ды базарға, не дүкенге өткіз­­бейді. Бұл – оның айнымай­тын ұстанымы. Өйткені дел­далдыққа бет бұрғандар қы­мыз­ға су қосуы мүмкін. Ал су ұлт­тық сусынның дәмін бұзады.

«Менің таңдауым ұлттық тағамдарды дайындауға түсті. Бұл кәсіпті бастағаныма бес жыл болды. Биелерге сүті құ­нарлы болуы үшін арпа, қара бидай мен кебек, жоңышқа бе­ремін. Жем-шөптің баға­сы да қымбат, айналада мал жайылатын жайылым тары­лып барады. Осы мәселе қиын­дау болып тұр», дейді Т.Төлегенұлы.

Оған жары Мөлдір Сисе­нова қолдау көрсетіп отыр. Ерлі-зайыптылар биенің санын 10-ға жеткізуді ойластырып жүр. Сиыр сауып, айран, құрт пен қаймақты саудаға шығарады.

«Алдағы жылдары балалар­ға ұлттық салт-дәстүрді насихаттайтын этноауыл ашқым келеді. Өйткені қазір балалар бос уақытын телефонға тел­мірумен өткізеді. Бұл олар­дың халқымыздың салт-дәстүрінен, әдет-ғұрпынан алшақтауына әсер етеді. Балалар бір мезгіл алтыбақан теуіп, садақ атып, асық ойнағанын қалаймын. Аға буын өкілдері этноауыл­да балаларға  ұлттық құн­ды­лықтың қадірі, жөн-жорал­ғысы туралы ұлағатты әңгі­ме айтып отырса, қазақы қал­пымызды жоғалтпас едік», деп ол ойында жүрген жоспарын жеткізді.

 

Атырау облысы