Фото: oqu_agartu
«Жаңа өзгерістердің 1000 көшбасшысы» жобасы шеңберінде республикалық кадр резервіне қабылданған кандидаттардың тізімі бекітілді. Оған білім беру ұйымдарының басшылары лауазымынан үміткер 208 адам кірді. Бұл туралы Оқу-ағарту министрлігінің баспасөз қызметі хабарлады. Мемлекет басшысының тапсырмасы бойынша Оқу-ағарту министрлігі 2023 жылдан бастап президенттік Жастар кадрлық резервінің үлгісі бойынша білім берудегі өзгерістер көшбасшыларын іріктеу және даярлау тетігін әзірлеу және бекіту жөніндегі жобаны іске асырып келеді. Бастапқы кезеңде барлығы 8068 өтінім түсті. Үміткерлер құзыреттіліктерін бағалау үшін тестілеуден өтті. Екінші кезеңде – үш деңгейлі оқыту, үшінші кезеңде – елдің жетекші мектептерінде тағылымдамадан өту, төртінші кезеңде – қорытынды бағалау және қорытынды кезеңде – министрлік жанындағы комиссиямен әңгімелесу болды. Барлық бес кезеңнің қорытындысы бойынша республикалық кадр резервіне 208 кандидат өтті. Іріктеудің барлық кезеңдерінен өткендерге сертификат беріледі. Оның негізінде үміткерлер конкурстық рәсімдерден өтпей-ақ бірінші басшының бос орнына тағайындалады. Сондай-ақ барлық кезеңнен сәтті өткен және сертификат алғандарға «Жетекші-көшбасшы» біліктілік санаты беріледі», делінген ақпаратта.
Іріктеуден өткен менеджерлер «Жайлы мектеп» ұлттық жобасымен салынып жатқан мектептерде кадр тапшылығын шешуге септігін тигізбек. Бұл жоба биыл да жалғасын тауып, кез келген педагог қатысуына болады.
