Оқиға • 08 Қаңтар, 2024

IT-дің атасы дүниеден өтті

139 рет
көрсетілді
2 мин
оқу үшін

Цифрлық ғаламға жан бітірген швейцария ғалымы, информатика маманы Никлаус Вирт 89 жасында қайтыс болды.

IT-дің атасы дүниеден өтті

Никлаус Вирт 1934 жылы 15 ақ­панда Швейцарияда дүниеге келген. IT атасының бағдарламалау тілі айқындық, қарапайымдылық және тиім­ділігімен  ерекше. Вирт  бағдар­ламалау тілдері нақты бекітілген ережелер жиынтығына айналуы керек деп есептеген. Сол мақсатына жету үшін 1968 жылы үлкен топ жасақтап, атақты физиктің құрметіне қойылған «Паскаль» тіл жобасын дайындады. Біршама еңбектен кейін әртүрлі плат­формаларға өтуге мүмкіндік беретін аралық p-коды бар Паскаль машинасы цифрлық әлемге аяқ бас­ты.  Солай 1970 жылы Никлаус Вирт Паскаль бағдарламалау тілін құрды. Оның негізінде Object Pascal және Delphi дүниеге келді. Ғалым бұл туралы «Мен өмір бойы барын­ша күшті, бірақ сонымен қатар мүмкіндігінше қарапайым тілді дамытуды мақсат еттім» деген еді. Қазіргі кезде барлық дербес ком­пьютерлер осы тілде жұмыс ат­қа­рады. Паскаль тілінде жазылған бағдар­ла­маның дұрыстығы компью­терде жеңіл тексеріледі және жіберілген қате тез түзетіледі. Бұл бағдарламалау тілінің басты мақсаты – студенттерге кәсіби бағдарламалауды үйрету. Дегенмен күрделі практикалық мәселелерді шешуге де жарамды болды.  1990 жылдары ол ең көп таралған алгоритмдік тілдердің біріне айналды. Әлемді тез жаулаған  коммерциялық алғашқы бағдарламалау тілі болып тарихта қалды.

Вирт – сондай-ақ Euler, PL 360, ALGOL w, Modula және Oberon тіл­дерінің де авторы. Ол компьютер­ге қатысты небір әзірлемелерді дайын­дайтын «Xerox PARC» зертхана­сында да жұмыс істеген. 1984 жылы информатика бойынша әлемдегі ең беделді сыйлық «Тьюринг» сыйлы­ғы­ның лауреаты болды. Стэн­форд университетінде, Цюрих университетінде, ETHZ-де  қаншама жыл бойы адал жұмыс істеді. Никлаус Вирт әлемнің бірнеше елінің құрметті докторы.