Алтын кенішінде жер астына автобуспен бірге түсіп кеткен екі адамды іздеу жұмыстары күні-түні жалғасып жатыр. Ойық шетіндегі топырақтың төменге қайта-қайта сырғуы құтқару жұмыстарында жүрген азаматтарға қауіп тудырып тұр. Кеше түсте жедел штаб хабарлағандай, құтқару іс-шараларында жер астын барлайтын арнайы геологиялық сканер құрылғысы пайдаланылып, құтқарушылардың жұмысы жеңілдей түскен.
Жексенбі күні ойықтың ернеуіне «Богатырь Көмір» кәсіпорнының үлкен краны орнатылды. «АК Алтыналмас» АҚ мен Павлодар облыстық төтенше жағдай департаментінің мамандары әлгі кранның көмегімен шұңқыр табанына мамандарды түсіріп, Балқаш қаласынан жеткізілген геологиялық радардың көмегімен топырақ қабатын сканерледі. Нәтижесінде, автобустың жатқан орны шамаланды.
– «Майқайыңалтын» АҚ тау-кен ауданындағы опырылған жерде іздестіру жұмыстарын жалғастырудамыз. Геологиялық сканердің нәтижелері өңделіп, шамамен автобустың орналасқан жері анықталды. Көлік жатқан жерге дейінгі ықтимал тереңдік 5-7 метрді құрайды. Шағын экскаваторды шұңқырға түсіру жоспарланып отыр. Оны ойық табанына жеткізу үшін траншея дайындау жұмыстары пысықталып, құтқарушылардың әрі қарайғы іс-қимылдарын күшейту туралы шешім қабылданды. Қаза тапқан және жоғалған құтқарушылардың отбасыларына «Майқайыңалтын» АҚ және КӘАҚҚ РОШ тарапынан 4,5 млн теңгеден астам мөлшерде материалдық көмек көрсетіледі. Мемлекет тарапынан марқұмдардың отбасыларына асыраушысынан айырылу бойынша әлеуметтік төлемдер тағайындалады. Қаза болған екі құтқарушының отбасыларына қайғырып көңіл айтамын, – деді облыс басшысы Асайын Байханов.
Майқайың кентінде бүгінде 9 мыңның үстінде халық тұрады. Кеніш ауылдың дәл іргесінде орналасқандықтан, жергілікті тұрғындар көп жылдан бері экологиялық ахуалға алаңдап келеді. Ойық пайда болған кеңістік үстінде алтын кенішіне апаратын жол болған. «Әлгі аумақта үнемі су жиналып, ойпаң болып жататын. Ал оның астындағы кеніш камерасының төбесінен үнемі су сорғалап болмаған соң, ол жерді шахта басшылығы жауып тастаған. Біз бұл аумақтағы жол аса қауіпті екенін, көліктерді басқа аумақпен жүргізу қажеттігін компания басшылығына талай мәрте айтқанбыз. Алайда біздің ұсыныс-пікірімізді акционерлік қоғам басшылары құлағына да ілмеді. Кеніштің шахтасында жуықта республикалық арнайы комиссия болып кеткенін естідік. Олардың көзіне ескі шахта ішіндегі кемшіліктер қалай түспегеніне таңбыз. Бұл мәселелерді айтуға жүрексінеміз. Себебі алтын кеніші мен кен байыту фабрикасынан өзім, балаларым, тіпті туыстарым нан тауып жеп отырмыз. Айналадағы жұрттың көбі солай. Компания басшылары бізді қудалауы мүмкін», дейді аты-жөнін жасырып қалғысы келген майқайыңдық азамат.
Майқайың кенті әкімдігінен алынған мәліметке сүйенсек, қазір «Майқайыңалтын» АҚ-да жалпы саны 1 012 адам еңбек етеді. Акционерлік қоғамның құрамында бүгінде екі кеніш тобы мен кен байыту фабрикасы, көлік цехы, көлік жөндеу шеберханалары мен химиялық зертхана, өзге де құрылымдық бөлімшелер бар. Кәсіпорын өз тарихында 80 тонна алтын, 1 240 тонна күміс, ал жалпы көлемі 16,7 млн тонна кен өндірген.
Айтып өтейік, автобуста болған төртеудің барлығы – кәсіби әскерилендірілген авариялық-құтқару қызметтерінің республикалық орталық штабы Павлодар филиалының қызметкерлері. Құтқару қызметінің ресми сайтында көрсетілгендей, Павлодарлық филиалда шамамен 209 адам еңбек етсе, оның 36-сы «Майқайыңалтын» АҚ-ның өндірістік базаларына жауапты болған. Бұдан бөлек, кәсібилендірілген мекеме Екібастұздағы және Бозшакөлдегі кен орындарына қызмет көрсетеді. Құтқарушылар алтыншы тәулік іздеп жатқан автобус ішінде аталған құтқару қызметінің жедел алдын алу жұмыстары жөніндегі взвод командирінің орынбасары Айдос Шаймерден (36 жаста) мен жедел автокөлік жүргізушісі Айып Тілеубергенов (55 жаста) бар. А.Шаймерден – 5 баланың әкесі, жұбайы екеуі 4 ер, 1 қыз баланы тәрбиелеп өсірген. Ал 12 қаңтар күні 56 жасқа толатын автобус жүргізушісі А.Тілеубергеновтің отбасында мүгедек қыз бала бар деп хабарланды. Екі азамат та – Майқайың кентінің тұрғындары.
Павлодар облысы,
Баянауыл ауданы,
Майқайың кенті
