Датук Камарудин МЕРАНУН: Қазақстан мен Малайзияның тығыз байланысы – негізгі арманым

Осы айтулы оқиғаға орай «Air­Asia X» әуе компаниясының құрыл­­­тайшысы, «Capital A» Ди­рек­торлар кеңесінің атқарушы төрағасы Датук Камарудин Меранун журналистермен кездесіп, өз жоспарларымен бөлісті.

«Қазақстан мен Малайзияны жақындастыру арманы менде ертеректе пайда болған. Бірақ оны жүзеге асыруға жаһандық індет үлкен ке­дергі келтірді. Пандемиядан кейін осы істі жандандыруды жалғас­тырдық», дейді Датук Камару-
дин.

Әлбетте, Азияның ірі әуе компаниясы екі ел арасында әуе рейстерін ашуға аяқасты шешім қабылдай салмайтыны аян. Қазақстанның ту­рис­тік әлеуеті, жаһан кезгенді жақ­сы көретін жерлестеріміз, екі елді Құдай кенде етпеген көрікті ме­кендер мен маркетингтік зерттеу­лер алғышарт болғаны даусыз. Дегенмен әлемдік ірі тасымал­дау­шының бірі саяхаттағанды сүйе­тін отандастарымызға арзан әуеби­лет ұсына ала ма деген сауалға келсек, «Capital A» Директорлар кеңесінің атқарушы төрағасы Датук Камарудин Меранун бірінші кезекте компания билеттердің қол­жетімді болуына мән беріп отыр­ғанын айтады.

Ақиқатына келгенде, екі ел ара­сындағы туристік әлеуетті оятуға, сауда-саттық және экономикалық байланыстарды нығайтуға Малай­зия туристік агенттігінің сауда мис­сия­сы, Қазақстандағы Малайзия ел­шілігімен қоса өзге де әуе тасымал­даушылары мүдделі десек, асыра дәріптеу емес. Оның дәле­­лі – кейінгі уақытта делдалдық деле­гациялардың белсенділігі. Шы­ғарып салғанымызға санаулы ғана күндер өткен 2023 жылы екі ел ара­сында талай мәміле жүрді. Сол сияқты «Air Asia X» компа­ния­сының жетекшілері еліміздегі әртүрлі құзырлы мекемемен келіс­сөздерді 2018 жылдан бері жүргізіп келеді.

Қысқасы, 14 наурыздан бас­тап Алматы мен Куала-Лумпур арасын­дағы әуе рейстері аптасына төрт (сейсенбі, бейсенбі, сенбі, жексенбі) рет ұшады. Айтқандай, бұл бұған дейін екі ел арасындағы туристік байланыс болмады деген сөз емес. Мысалы, COVID-19 басталғанға дейін 2019 жылы Малайзияға Қа­зақ­станнан 18 138 турист барған. Бұл ел пандемияға дейін, тек 2019 жы­лы шетелдерден 26 млн турист қабылдаған. Бір жағынан Малай­зияның Қазақстанға беріп отырған ең үлкен артықшылығы – 30 күнге дейін виза талап етілмейді.

Ал «Air Asia Aviation Group» құрамына кіретін, 2006 жылы құ­рылған «Air Asia Х» компания­сы­ның А-320, А-320neo, А-321neo және A-330 типті 270 әуе кемесі бар. Фран­­­шиза аясында компания Ма­лай­­зияны 25 мемлекетпен жалғап отыр.

Қалай десек те, Азиядағы ірі лоукостердің Орталық Азияға келуі қай тұрғыда болса да маңызды. Малайзияның қай кезде де Шығыс Азияның қақпасы іспетті, жиһан­кездерді, шым-шытырық оқиға, бұрын ауыз тиіп көрмеген ас мәзірін сүйетіндерді өзіне сүйрей алатын қызықтары жетіп-артылады. Оған қоса қазақтар да саяхатшы халық екендігімен таныла бастады.

Осы орайда Датук Камарудин Меранун: «Бұл – «AirAsia X» үшін де тарихтың жаңа тараулары, Алма­ты мен Куала-Лумпур арасын жал­ғай отырып, өзіміз құрылғалы бері 16 жылдың ішінде бірінші рет на­рықта құлаш жайғалы отырмыз. Біз Қазақстанмен тікелей рейс­­терді жүзеге асыратын ал­ғаш­қы малайзиялық компания екені­мізді мақтан тұтамыз. Орталық Азия­ға бастаған алғашқы қадам, Қа­зақстан нарығына шығу, пандемиядан кейін танымал бағыттарды жаңғыртуда жаңа аймақтарды зерттеу – әріден ойлайтынымыз бен шешімталдығымыздың белгісі. Ал Қазақстан Орталық Азиядағы ең бай ел екенін ескерсек, Алматыға тікелей рейстер ашу сауда-саттық, коммерциялық байланыстар мен білім алмасуға, жаңа жұмыс орындарын құруға айтарлықтай игі ықпал етеді», дейді.

Сонымен, рейстердің қосылу құрметіне қолжетімді промо-тарифтер бір бағытқа 249 доллардан бас­тап, «Premium Flatbed» рейстерінде 699 долларға дейін баратынын айта кетуге болады.

«Біз Қазақстаннан келген сая­хатшыларға Сабахтағы, Куала-Теренгган мен Лангкавидегі таңға­жайып жағажайларды, Пенангтегі аспаздық жұмақты, Саравактағы ЮНЕСКО-ның бүкіләлемдік мұра­­лары мен басқа да ішкі бағыт­тарды тамашалауға мүмкіндік бе­ретінімізді мақтан тұтамыз. Біздің fly-Thru байланыстарымыз арқылы туристер Куала-Лумпурдан Таи­ланд­тағы Пхукетке, Крабидегі Оңтүс­тік-Шығыс Азия інжу-мар­жан­дарына, Индонезиядағы Бали мен Ломбокқа, Камбоджадағы Сием Рип, Вьетнамдағы Сайгон сынды таңғажайып өлкелерге ұша алады. «Алматы – Куала-Лум­пур» бағы­ты арқылы біз екі ұлы ел­дің, хал­қы тығыз қоныстанған өңір­лер арасындағы сапарларға жол ашып қана қоймай, Қазақстан мен Малайзия арасындағы байланыстарды нығайтуға, сондай-ақ екі елдің әлеуметтік-экономикалық секторларын байытуға ұмтыламыз», дейді.

АЛМАТЫ