Пікір • 09 Қаңтар, 2024

Алға ұмтылған озады

851 рет
көрсетілді
5 мин
оқу үшін

Ел Президенті Қасым-Жомарт Тоқаевтың «Egemen Qazaqstan» газетіне берген сұхбатын егжей-тегжей оқып шықтық. Сұх­батқа көпшілікті толғандырған көптеген өзекті мәселе арқау етілген. Кейінгі жылдардағы елімізде жүргізілген әлеу­мет­тік-экономикалық реформалар мен ішкі және сыртқы саясат тура­лы шешімдер, қоғамдағы түрлі жағдай қам­тыл­ған. Сонымен қатар экономикалық, қоғамдық-саяси және гуманитарлық салаларда биыл жүзеге асатын бірқатар ма­ңызды іс-шараға кеңінен тоқталды.

Алға ұмтылған озады

Президенттің алдағы атқары­ла­тын басты міндеттерге айрықша мән бере сөйлеуі 2024 жылдың ел өміріне оң өзгерістер алып келетін жауапты жыл боларына сендіреді. Мәселен, 2029 жылға қарай ішкі жалпы өнімнің екі еселенуін көз­­дейтін жаңа экономикалық үлгіге көшу ел экономикасы үшін маңызды қадам екенін тағы бір мәрте қадап айтты. Көп күттірмей Үкіметтің кеңейтілген отырысын­да осыған байланысты нақты іс-шешімдер айқындалатынын жет­кізді. Сыртқы саясатқа келе­тін болсақ, мұндағы жасалатын әрбір қадам тікелей ұлт мүд­де­сімен ұштаса жүзеге асатынын мәлімдеді. Қазақстан биыл бірнеше беделді халықаралық ұйымға төрағалық ететінін оқы­ған­да, көңіліміз марқайып, елі­міз­дің шет мемлекеттер ара­сын­дағы абырой-беделін асқақ­та­тар мұндай бастамаларға зор үмітпен көз тіктік. Бауырлас ха­лықтар арасындағы мәдени-гуманитарлық байланыстарды кеңейту және ұлттық спорт түрлерін танымал ету үшін Қа­зақ­станда Дүниежүзілік көш­пелілер ойнын өткізу идеясы жыл мұратымен жылы астасып жатқаны қуантады.

Осы орай­да бізді, ғалымдарды тағы бір ерекше жайт – тарихи ірі тұлғалар тағылымымен табыстыратын іс-шараларға мемлекеттік дең­гейде көңіл бөлініп отырғаны сүйсінтеді. Белгілі ғалым Қаныш Сәтбаевтың – 125, қазақтың батыр ұлдары Сағадат Нұрмағамбетов пен Рахымжан Қошқарбаевтың – 100, сондай-ақ Жошы ұлысының 800 жылдығы аталып өтпек. Мұның қабатында Қазақстан та­ри­хына қатысты ауқымды жоба­ның аяқталу кезеңі жақындап қалғанын біліп жатырмыз.

2022 жылғы Қаңтар оқиғасы туралы бұған дейін дәл осын­ша­лық ауқымды және ашық әңгіме болмаған еді. Сұхбаттан қайғылы оқиғаның басқа да себептері мен алғышарттары туралы егжей-тегжей мағлұмат алып, көкейде жүрген көп сұраққа жауап таптық. Жылдар бойы жинақталып, ше­шімін таппаған әлеуметтік-эко­но­микалық проблемалар қо­ғам­да наразылық тудырғаны, ал мұндай сәтті өзгерісті қала­май­тын, қоғамдағы тауарларды әділ бөлуге ба­ғыт­талған реформаларды қа­былдағысы келмейтін топ өзде­рінің мүддесіне пайдалануға әрекет еткені, қылмыстық топтар мен арандатушылар зорлық-зомбылықпен, талқандаумен, өртеумен, мүлікті жоюмен ай­­на­лысып, наразылық соңы жағ­­дайдың ушығуына әкеліп тірегені мәлім. Президенттің сон­дағы батыл іс-әрекеті тәуел­сіз­дік туын шайқалтпай ұстап қалды.

Президент еліміздің эко­но­­микалық дамуына айрықша тоқ­тал­ды. Ұлттық экономиканың көлемін екі есеге дейін арттыру ел алдында тұрған айқын мақ­саттың бірі саналады. Бұған қалай қол жеткізуге болады? Ресурс­тарды оңтайлы бөлу және тиімді жоспарлау арқылы ғана экономиканың тамырына қан жүгіретіні анық. Осы орайда әлемдегі экономикалық ахуалдың күрделі жағдайы ел дамуы­на сал­қынын тигізбей тұрмасын тілге тиек еткен Мемлекет басшы­сы кез келген қиындықтың өзі кейде жаңа мүмкіндікке жол ашатынын, ол үшін Үкіметтің сондай күрделі кезеңнен алып шығатын жан-жақты ойлас­тыр­ған жос­пары болуы керек­тігін айтты. Президенттің осы сөзіне біз де толығымен қосы­ла­мыз. Үкіметтің күнделікті жұ­мы­сын­дағы басты қағида осы сөз бол­ғаны жөн. Олай дейтін себебіміз, қазіргі азық-түлік проблемасы болсын, қымбатшылық пен бағаның тұрақсыздығы болсын, елдегі басқа да шешімін таппаған әлеу­мет­тік мәселелердің қай-қай­сысы да Үкімет қабылдаған ше­шім­дерге барып тіреліп жататыны айдан анық.

Президенттің білімпаздық, кәсібилік, адалдық сияқты адами қасиеттер туралы мәлімдемесі ерекше назар аударуға тұрарлық. Сонымен бірге ол жат мәдениетке еліктеуді, жалған патриотизмді және дарақы мақтануды әсте қабылдамайды. Мемлекет бас­шысының бұл тұр­ғыда айтқандары озық ойлы зиялы қауым өкілдерінің де ой­ларымен әрдайым қабысып тұра­ты­ны еш күмән туғызбайды. Адами қасиеттер мен ұлттық құн­­дылықтар жайында қозғаған ой­лары мен әрбір сөзін жаны­мыз­ға жақын тұтамыз әрі қоғамның оң өзгерісіне біз де күш-қайра­ты­мызды аямай жұмсай береміз.

Осы сұхбатты оқып отырғанда тағы бір ішімізді жылытқан нәрсе – «2024 жылды қалай қарсы алдыңыз?» деген сұраққа «Жаңа жыл маған қастерлі мереке емес... Оның үстіне, өзіміздің төл жаңа жылымыз – әз Наурызды естен шығармаған жөн. Бұл мейрам – тіршілікті түлете келетін нағыз табиғи жыл басы» дегені.

 

Зейнеп БАЗАРБАЕВА,

ҰҒА академигі