ФОТО: olympic.kz
Спорттық бәсекеде Атырау, Ақтөбе, Ақтау Орал және Жаңаөзен қалаларынан келген 6 команда – барлығы 60-қа тарта спортшы бақ сынады.
Спорттық жарыстың ашылу салтанатында 5548 әскери бөлімінің командирі, подполковник Санат Тәбетов сөз сөйлеп, әскери қызметшілердің арасында спортшылардың шеберлігін шыңдау өте маңызды екенін айтты. Сонымен қатар қатысушыларға сәттілік тілеп, спортпен тұрақты айналысып, саламатты өмір салтын орнықтырудың маңызын атап көрсетті.
Ойын алаңына әуелі Орал қаласының 5517 әскери бөлімінің командасы мен Жаңаөзен қаласының 5548 әскери бөлімінің волейболшылары шықты. Алғашқы минуттан-ақ оралдықтар шабуылды үдетіп, есепті еселеп алды. Жаңаөзендіктер де қарап қалмады, кешікпей ойын тізгінін қолына алып, есепті теңестіре білді. Ойынның аяқталуына санаулы минут қалғанда Орал командасының айы оңынан туып, жеңіске жетті.
Жарысқа қатысушылардың бәрі де барынша шеберлік көрсетіп, өз командасы үшін аянып қалмады. Екі күнге созылған тартысты сайыстың қорытындысы бойынша Орал қаласының 5517 әскери бөлімінің командасы бірінші орынға қол жеткізді. Екінші орынды Ақтау қаласынан келген 6656 әскери бөлімінің ойыншылары иеленді. Ал үшінші орын алаң иелері – 5548 әскери бөлімінің командасына бұйырды. Жеңімпаз-жүлдегерлер кубок, грамота, бағалы сыйлықтармен марапатталды.
Батыс Қазақстан облысы
