Атырау қаласында өткен салтанатты рәсімге Қорғаныс министрлігінің, қалалық әкімдіктің, қорғаныс істері жөніндегі департаменттің өкілдері және «Сармат» мамандандырылған мектеп-лицей-интернатының оқушылары қатысты.
1942 жылы хабар-ошарсыз кеткен Қисым Әдиевтің сүйегін «Феникс» жасағының іздеушілері Смоленск облысының Темнин ауданына қарасты Батюшково ауылы маңынан тапқан. «1911 жылы туған Қисым Әдиевті медальоны арқылы анықтауға мүмкіндік туыпты. Ең қуаныштысы, оның туыстары да тез табыла кетті. Біз қаза тапқан жауынгердің ұлы Сембай Қисымовқа әкесінің «Шагнувший в бессмертие» медалін қоса табыстадық», деп атап өтті «Аtamnyn аmanaty» қоғамдық бірлестігі баспасөз қызметінің басшысы Әбубәкір Смайылов.
Қисым Әдиев 80 жылға жуық уақыт хабар-ошарсыз кеткендер тізімінде болған. Ол майданға аттанғанда артында әйелі мен ұлы Сембай қалыпты.
– Әкем соғысқа кеткенде мен екі жаста ғана болыппын. Ол кісі содан қайта оралмады. Бізге осы қуанышты сыйлаған іздеушілер мен «Atamnyn аmanaty» қоғамдық бірлестігіне алғысым шексіз, – деді Сембай Қисымов.
Жауынгерлік дәстүрге сәйкес марқұмның сүйегі мен дулығасы, медальон секілді жеке заттары туыстарына табыс етілді. Енді сарбаз туған жерінде әскери құрметпен қайта жерленеді.
