АТР рейтингінде төртінші орында тұрған Я.Синнер финалда әлемнің үшінші ракеткасы Даниил Медведевпен күш сынасты. Алғашқы екі сет 6:3, 6:3 есебімен ресейлік ойыншының пайдасына шешілгенде енді оны тоқтату мүмкін еместей көрінген еді. Алайда шешуші тұста Апеннин түбегінің өкілі ширақ қимылдап, жеңісті қарсыласының уысынан жұлып әкетті. Соңғы үш сет 6:4, 6:4, 6:3 есебімен аяқталды. Сөйтіп, 22 жастағы Янник өзінің спорттық жолындағы алғашқы «Үлкен дулығаға» ие болды. Осыған дейінгі оның ең үздік көрсеткіші былтыр Уимблдонның жартылай финалына дейін жетуі еді.
Жасыл құрлықтағы жарыста Янник Синнер Даниил Медведевтен бөлек, Ботик ван де Зандсхулп пен Йеспер де Йонг (Нидерланд), Себастьян Баэс (Аргентина), Карен Хачанов пен Андрей Рублев (Ресей) және Новак Джокович (Сербия) сынды саңлақтарға сан соқтырды.
