Іс-шараға белгілі композитор Мақсат Жәутіков, «Құрмет», «Даңқ» ордендерінің иегері, Панфилов ауданының Құрметті азаматы, еңбек ардагері Күлғайша Бердіғұлова, тыл еңбеккері, Социалистік Еңбек ері Күләш Айтжанова және Қазақстанның еңбек сіңірген мұғалімі Нұрғайша Шайділдинова арнайы шақырылды.
Қос батырдың ғасырлық мерейтойына арналған кешті Құрлық әскерлері бас қолбасшысының тәрбие және идеологиялық жұмыс жөніндегі орынбасары, полковник Ермиян Бятов ашты.
«Биыл біз қазақ халқының даңқты ұлдары, батырлар Сағадат Нұрмағамбетов пен Рақымжан Қошқарбаевтың 100 жылдығын атап өтеміз. Олар көзсіз ерлігі мен жанқиярлық қызметінің арқасында өшпес даңққа бөленді. Батыр аталарымыз біз үшін де, болашақ ұрпақ үшін үлгі болып қала береді», деп атап өтті ол.
Кездесуде даңқты батырлар туралы мазмұнды баяндамалар оқылды. Әсіресе олармен етене таныс болып, бірге қызмет еткен көзкөргендердің естеліктері ерекше құнды болғанын да айта кету керек.
Әскери қызметшілердің отбасы мүшелерімен жұмысты ұйымдастыру қызметі іс-шараға әскери қызметшілердің ата-аналарын да қатыстырды. Ұлдары Ақтау қаласы мен Меркі аулында қызмет етіп жатқан аналар балаларымен бейнебайланыс арқылы сөйлесе алды.
Іс-шара аясында Халық қаһармандары Сағадат Нұрмағамбетов пен Рақымжан Қошқарбаев туралы кітап көрмесі ұйымдастырылып, деректі фильмдер көрсетілді. Кездесуде бірқатар сарбазға, бөлімше командирі мен бөлімше фельдшеріне адал қызметі үшін алғысхаттар мен бағалы сыйлықтар тапсырылды.
Іс-шара 74261 әскери бөлімі көркемөнерпаздарының күшімен дайындалған концертпен аяқталды. Кеш барысында тектіліктің, сүйіспеншілік пен адалдықтың символы болған офицерлер вальсі ерекше әсерлі болды.
