![Анасымен бірге шашбау әзірледі](/media/2024/01/31/shashbau.webp)
Қазақ халқының әдет-ғұрпы, салт-дәстүрі және өнері мен құндылықтарын дәріптеп жүрген «Star» білім және өнер орталығы Батыс Қазақстан облыстық тарихи-өлкетану музейімен бірге тағылымды іс-шара ұйымдастырды.
Қазақ қыздарын қолөнерге баулу үшін ұйымдастырылған шеберлік сабағы халқымыздың ұлттық бұйымдары – шекелік және шашбау жасауға арналды. Әуелі аналар мен қыздар облыстық тарихи-өлкетану музейі қорынан әкелінген күміс әшекей бұйымдары көрмесімен танысты. Музейдің экскурсия ұйымдастыру және экскурсиялық қызмет көрсету бөлімінің меңгерушісі Жанаргүл Абылайқызы іс-шараға қатысушыларға ХVIII–ХХ ғасырлар жәдігері – шекелік, шашбау, өңіржиек, құстұмсық жүзік, құдағи жүзік, т.б бұйымдарын көрсетіп, әр бұйымның мән-мағынасын, тарихын айтып берді. Осыдан кейін анасы мен қызы болып бірлесе әшекей бұйымдарын өздері жасауға кірісті. Оларға шебер Әсел Нұржанқызы ақыл-кеңес беріп жүрді.
«Біздің «Қазақ қызы» деп атаған жобамыздың мақсаты – халқымыздың өнері мен құндылығы арқылы қыз бала тәрбиесін еске түсіру, ана мен қыз арасындағы нәзік қарым-қатынасты ояту», дейді «Star» білім және өнер орталығының жетекшісі Айгүл Бауыржанқызы.
Батыс Қазақстан облысы