– 2024 жыл Қазақстан үшін халықаралық аренада байланысын нығайтып, саяси алаңда маңыздылығын арттыратын ерекше жыл болады. Бұған «Жастар рухы» қалай атсалысасыздар?
– Шанхай ынтымақтастық ұйымының елдер арасында жастардың байланысын нығайтып, ортақ мүдде үшін жұмыс істейтін Жастар кеңесі бар. Тиісінше, ШЫҰ Жастар кеңесіне Қазақстаннан «Amanat» партиясының «Жастар рухы» жастар қанаты кіреді. Осындай ауқымды ұйымға төрағалық ету бізден үлкен жауапкершілік пен сенімді талап етеді. Өздеріңіз білесіздер, 2023 жылдың шілде айында Қасым-Жомарт Тоқаев ШЫҰ-ға мүше мемлекеттер басшылары кеңесінің отырысында сөйлеген сөзінде, «үш зұлым күшке»: трансұлттық ұйымдасқан қылмысқа, заңсыз есірткі айналымына және киберқылмысқа қарсы күреске баса мән берілетінін айтқан болатын. Сондай-ақ Президент цифрлық технологияларды дамытудың өзектілігіне және экология саласындағы өзара іс-қимылды нығайтуға назар аударды. Жоғарыда айтылған 4 бағытты негізге ала отырып, Алматы облысында Шанхай ынтымақтастық ұйымы Жастар кеңесінің аясында «Жастар кеңістігі: Әділетті әлем және келісім» халықаралық жастар саяси лагері өтті. Онда Қазақстан, Қытай, Қырғызстан, Тәжікстан, Ресей, Өзбекстан және Үндістаннан келген қонақтар, Жастар қанаты мүшелерінің қатысуымен 300 делегаттың басы қосылды. Беларусь республикасы бақылаушы тарап ретінде қатысты.
ШЫҰ Жастар кеңесінің жұмысы тек лагерьмен шектеліп қалған жоқ. Ұйымға мүше елдермен жұмысты нығайту және экология, есірткімен күрес, цифрландыру, креативті индустрия бағыттарындағы мәселелерді қозғау мақсатында онлайн форматта кездесулер өткізіп жүр.
– Сол іс-шаралардың бірқатарын айта өтсеңіз.
– Мәселен, өткен жылдың қарашасында XXI ғасырдың басты мәселесінің бірі – нашақорлықпен күресті қозғадық. Жастар қанатының Шанхай ынтымақтастығы ұйымының Жастар кеңесіне төрағалық ету аясында өткен кездесуге Шанхай ынтымақтастық ұйымының Жастар кеңесінің жетекшілері мен мүшелері, сондай-ақ нашақорлықпен күрес саласының сарапшы мамандары қатысты. Ал 30 қаңтар күні жаһандық экология тақырыбын қозғап, әр елдің осы саладағы мамандарының пікірі мен ұсыныстарын тыңдау жоспарланып отыр. Қазақстан атынан су тапшылығы, ауаның ластануы сынды бағытта жұмыс істеп жүрген танымал эколог мамандар да қатысады.
Алдағы уақытта креативті индустрия, цифрландыру тақырыптары шеңберінде жас сарапшылар, білікті мамандардың қатысумен кездесулер өткізу ойда бар. ШЫҰ Жастар кеңесіне мүше елдер арасында саяси-экономикалық байланысты күшейтіп, Қазақстан жастарының халықаралық аренадағы абыройын биіктетерімізге сенімдіміз.
Сондай-ақ Қазақстанның төрағалығы шеңберінде биыл жазда Мемлекет басшыларының біріккен отырысы өтеді. Басқосуда алдағы уақытта бекітілетін күн тәртібі шеңберінде ШЫҰ Жастар кеңесі Ұлттық бөліктерінің жетекшілерін жинап, іс-шаралар кешенін өткізеді.
– ШЫҰ кеңістігінде 3,5 миллиардқа жуық халық тұрса, олардың жартысы – жастар. Ал Қазақстан ұйымның Жастар кеңесіне 2009 жылдан бастап мүшелік етеді екен. Жасалған жұмыстармен бөліссеңіз.
– «Жастар рухы» жастар қанаты Ислам Ынтымақтастығы Ұйымы Жастар форумының (ICYF-ERC) мүшесі. Атаулы ұйыммен ынтымақтастық аясында жастар қанаты бірнеше нәтижелі іс-шаралар өткізді. 2021 жылы Түркістан облысындағы халықаралық жастар-саяси лагері, 2022 жылы Жамбыл облысында және 2023 жылы Алматы қаласында өткен республикалық пікірсайыс турнирлері де Ислам Ынтымақтастығы Ұйымы Жастар форумының ұйытқы болуымен өтті. Жақында ғана Әзербайжан Республикасының астанасы Бакуде Ислам Ынтымақтастығы Ұйымы Жастар форумының (ICYF-ERC) басқарма мүшелерінің басын қосқан жиын өтті. Басқосуда әр елде өткен іс-шаралар қорытындыланып, ұйымның 2024 жылға жоспарлаған жобаларын талқыладық. Қазақстан тарапынан біз де әлеуметтік-мәдени жобаларға қатысты ұсыныстарды айттық.
Одан бөлек, француз-әзербайжан университетінің студенттерімен кездесуде болдық. Кездесуге қатысушылар Қазақстан, Пәкістан, Румыния және Татарстанның жастар саясаты мен сайлау науқаны кезеңіндегі қолданылған саяси технологиялар және іс-тәжірибелерімен танысты. Бірнеше сайлауалды науқанның қатысушысы әрі негізгі аудиториясы ретінде «Жастар рухы» жастар қанатының белсенділері атқарған жұмыстар жөнінде айттым.
– Әңгімеңізге рахмет.
Әңгімелескен –
Зейін ЕРҒАЛИ,
«Egemen Qazaqstan»
