Әлеуметтің әлеуетін арттыратын жоба әлеуметтік төлем жасауды жеңілдетеді. Цифрлық төлем құралы Ұлттық банктің жедел төлем жүйесімен іске асады. Отандық «BTS Digital» IT-компаниясы әзірлеген әмиян «eGov» мобильді қосымшасына біріктірілді. Онда барлық әлеуметтік төлемді алуға, қаражатты карталарға аударуға, сондай-ақ тегін дәрі-дәрмек пен мектепте түскі ас алуға мүмкіндік бар. Әлеуметтік әмиян жобасының қанатқақты қадамы өткен жылдың қараша айында цифрлық әлемге аяқ басқан. Содан бері бірқатар сауда және қызмет көрсету нысаны жобаға қосылып, оны іс жүзінде сынап көрді.
– Халық мемлекеттік төлем алушылармен бірге әлеуметтік әмияндарға есептелген әлеуметтік жәрдемақы есебінен азық-түлік пен шаруашылық тауарларын, дәріханадан тегін дәрі-дәрмек сатып алып жүр. Өз бақылауымыздан өтті. Жоба – қауіпсіз әрі ыңғайлы. Мысалы, деректерді жаңарту үшін мекемелерге, дәрі нұсқаулығын алу үшін әрдайым дәрігерлерге барудың қажеті жоқ. Тек телефонда жаңарту жұмыстарын жасау жеткілікті, – дейді «Қазақтелекомның» стратегиялық басқару жөніндегі бас директоры Батыр Маханбетажиев.
Расында да, қызмет мүмкіндігінше қарапайым әрі қолдануға ыңғайлы. «eGov-mobile» қосымшасының көмегімен кассада көрсетілген «QR» кодын сканерлеу жеткілікті. Ешқандай комиссия мен қосымша төлемдер де жоқ. Әлеуметтік әмиянды қолданып жүрген Галина Высочанская «Мен қосымшаны үш айдан бері пайдаланамын. Әмиян – өте ыңғайлы. Өйткені үнемі бір жерге барудың, қолма-қол ақша алудың қажеті жоқ. Бәрін телефонмен-ақ жасаймын», деп тәжірибесімен бөлісті.
Әлеуметтік әмиянның тағы бір артықшылығы – оқушыға қажет қызмет көрсету түрін анықтауға мүмкіндік береді. Яғни ата-аналар баланың тамағы мен қажеттеліктері үшін мектепке барып жүрмейді. Егер балаға ыстық тамақ қажет болса, олар мемлекеттен тиісті «SMS» алады. Қызметті алуға келісім беретіндерін жауап хабарламасымен жіберсе жеткілікті, қосымша құжаттар керек емес. Бұл сонымен қатар мектеп қызметкерлеріне түсетін жүктемені де азайтады.
Ақкөл қаласы П.Исаков атындағы №1 мектептің директоры Әсел Садықова «Қанатқақты жобаға біздің мектептің қатысқанына қуаныштымыз. Қағазбастылықтан құтылу және уақытты үнемдеу арқылы жұмысты жеңілдетті. Ата-аналар да балаларының қалай тамақтанатынын көріп, уайымсыз жүр», деді.
Қазір әлеуметтік әмиянда мемлекеттік қолдаудың көптеген түрі бар. Болашақта жеңілдетілген бағамен өнімдерді сатып алу, инватакси қызметтері, ерекше қажеттіліктері бар адамдарға оңалту құралдарын сатып алу сынды мүмкіндіктерді қосу жоспарланып отыр.
