Бұл – Мемлекет басшысының «Әділетті Қазақстанның экономикалық бағыты» атты Жолдауында айтылған отандық қорғаныс-өнеркәсіп кешенін дамыту жөніндегі міндеттерді іске асыруға бағытталған жұмыстың нәтижесі.
Бұл құрылғылардың ұшу-техникалық талаптарға сәйкестігін бағалау үшін комиссия тағайындалды. Оның құрамына Қарулы күштер Бас штабы мен Әуе қорғанысы күштерінің Ұшқышсыз басқарылатын авиация жүйелерін дамыту және оларды қолдану департаментінің офицерлері кірді.
Барлық ұшу техникасы заманауи бейнебақылау құралдарымен, датчиктермен, қашықтық өлшегіштермен және тепловизорлармен жабдықталған. Сарапшылардың назарына әртүрлі ұшу аппараты көрсетілді. Олар арнайы резеңке жолақтың керілуімен көкке катапульта арқылы ұшып, сонымен бірге орнынан тікұшақ сияқты тігінен көтеріліп, әуеде қалықтады.
– Отандық өндірушілер ұшқышсыз басқарылатын құрылғыларды қысқа мерзімде жасады. Олардың жұмысының нәтижесін көріп, бағалай алдық. Әрине, әлі де пысықтайтын мәселелер бар. Десек те, бастамасы жақсы, – деп атап өтті Қарулы күштер Бас штабы Ұшқышсыз басқарылатын авиациялық жүйелерді дамыту және оларды қолдану департаментінің офицері, полковник Ержан Жақашев.
Отандық өндіруші компаниялар әскерилердің барлық талабы мен сұранысын ескеруге тырысты. Елімізде өндірілген ұшқышсыз басқарылатын аппараттарды қару-жарақ құрамына қабылдау бюджет қаражатын едәуір үнемдеуге, оларды кейіннен күтіп ұстау және жаңғырту мәселелерін тез арада шешуге мүмкіндік береді.
– Аппараттардың күндізгі және түнгі камералары өте тиімді, координаттарды анықтау функциясы, лазерлік қашықтық өлшегіш және оқ-дәрілерді тастау жүйесі де бар. Мұндай сипаттамалар артиллерияны нысанаға бағыттауға мүмкіндік береді. Бұны Қарулы күштердің мамандары жақсы бағалайды деп ойлаймын, – деді өндіруші компания өкілі Айбек Ахыш.
Сынақ аяқталғаннан кейін комиссия мүшелері отандық ҰҰА әзірлеушілеріне ұсынылған құрылғылардың нұсқаларын пысықтау және толықтыруға қатысты ұсыныстар берді.
