Облыстық жұмыспен қамтуды үйлестіру және әлеуметтік бағдарламалар басқармасының басшысы Азамат Мәмбетовтің дерегіне сүйенсек, 16 мың адамның жалақысына ішінара субсидия беріледі. Мемлекет тарапынан көрсетілетін мұндай көмекті әлеуметтік және қоғамдық жұмыстарға, жастар тәжірибесіне, «Алғашқы жұмыс орны» мен «Күміс жас», «Ұрпақтар келісімшарты» жобалары аясында жұмысқа орналасқандар алады. Бұған қоса қысқамерзімді оқу курстарында 585 адам біліктілік шыңдап, онлайн Skills арқылы 1 880 адам қамтылады. Ал 72 адам ваучерден өткізіледі. «Бастау-бизнес» жобасымен кәсіпкерлік негіздерін меңгеру үшін 2 615 адам оқуға жіберіледі. Өз ісін ашу бағытында әлеуметтік осал санаттарындағы 291 адамға қайтарымсыз гранттар мен 2,5 пайыздық жеңілдік, 142 жасқа микрокредит беру көзделіп отыр. Кәсіптік бағдарлаудан 15 041 адамды өткізу көзделген.
Мұнайлы өңірде мүмкіндігі шектеулі жандар мен пробация есебінде тұрған, жазасын өтеу орындарынан босап шыққан адамдар үшін жұмысқа орналастыру квотасы белгіленіп отыр. Оларды жұмысқа қабылдайтын мекемелер тізбесі бекітілген.
Қазір өңірде мүмкіндігі шектелген 24 534 адам бар. Оның ішінде бірінші топтағы мүгедектер – 2 293, екінші топтағылар саны – 8 789, үшінші топтағылар – 9 254. Ал 4 198 балаға мүгедектік санаты берілген. Мүмкіндігі шектелгенімен, табыс тапқысы келетіндер аз емес. Мәселен, былтыр жұмыспен қамту орталықтарына мүмкіндігі шектелген, бірақ жұмыс істеуге қабілетті 1 182 адам жүгінген. Оның ішінде 1 019 адамға әлеуметтік қолдау көрсетілген.
«Былтыр басқармаға жүгінген мүмкіндігі шектеулі жандардың арасынан 273 адам тұрақты жұмысқа орналасты. Оның 77-сі квотамен қамтылды. Ал ақылы қоғамдық жұмысқа 328 адам тартылды. Әлеуметтік жұмыс орнына 17 адам, жастар тәжірибесіне 35 түлек жіберілді. «Алғашқы жұмыс орны» жобасы арқылы – 7, «Күміс жас» жобасы шеңберінде жасы 50-ден асқан 18 адам жұмыс тапты. «Бастау-Бизнес» жобасымен кәсіпкерлік негіздері курсынан мүгедектік санатындағы 289 адам өтті», деп хабарлады басқарманың баспасөз қызметі.
Сондай-ақ «Теңізшевройл» компаниясының қолдауымен оқу курсына – 4, арнайы жұмыс орнына 7 адам жіберілген. Ал 41 адамға 400 айлық есептік көрсеткіш көлемінде мемлекеттік грант берілген. Мүмкіндігі шектелген 7 адамның жұмыс орны арнайы құрал-жабдықтармен қамтамасыз етіліп отыр.
Атырау облысы
