Осы жылдың басынан елімізде қазақ бейнелеу өнерінің негізін салушы, Қазақстанның халық суретшісі Әбілхан Қастеев пен КСРО халық суретшісі Орал Тансықбаевтың 120 жылдығы аталып өтіп жатыр. Осы орайда, бұл шығармашылық көрмесін бала күнінен өзіне пір тұтқан айтулы қос тұлға рухына арнаған суретші Сейсенхан Орынбекұлы әр жылдарда жазған пейзаж жанрындағы туындыларын өнерсүйер қауым назарына ұсынды. Астанадағы «НАS SANAT» галереясында ашылған көрмеге белгілі мемлекет және қоғам қайраткерлерімен қатар қарапайым жұртшылық көп жиналды.
Іс-шараға арнайы қатысқан Сенаттың Әлеуметтік-мәдени даму және ғылым комитетінің төрағасы Нұртөре Жүсіп алғашқы сөзді алып, С.Маханбеттің қылқаламынан туындаған картиналарына жоғары баға берді. Сонымен бірге Мәжілістің Халықаралық істер, қорғаныс және қауіпсіздік комитетінің төрағасы Айгүл Құспан мен Мәжіліс депутаты Қазыбек Иса сөз алып, суретшіге шығармашылық табыс тілеп, оның туындыларына бұрыннан қызығушылық танытатыны туралы жылы лебіздерін білдірді. Көрмеге қойылған картиналарының өзіндік ерекшелігі мен пейзаж жанрдағы шынайы да табиғи қолтаңбасына тоқталды.
Көрменің ашылуында ТүркСОЙ-дың бас хатшысы Сұлтан Раевтың Сейсенхан Маханбетке жолдаған құттықтау хаты оқылды. «Қарымды да талантты қылқалам шебері ретінде шығармашылығыңызды жоғары бағалап, 2022 жылы түркі әлемі суретшілері арасында Сізді ТүркСОЙ-дың ең жоғары марапаты – Алтын медаль төсбелгісімен марапаттағанымызды жұртшылық жақсы біледі. Есімі күллі ел есінде қалған, өнер жолыңызда кумир тұтқан қос шеберге арнап өз шығармашылығыңызбен көрме ашып жатқаныңызға маңыз бере отырып, ТүркСОЙ ұйымы атынан шығармашылық табыс, зор денсаулық, таусылмас қайрат, шалқар шабыт тілеймін» делінген құттықтауда.
Сонымен бірге Мәдениет және ақпарат министрлігі Мәдениет комитетінің басқарма басшысы Гүлзейнеп Әнапияқызы Мәдениет және ақпарат министрі Аида Балаеваның құттықтау хатын оқып, көрме иесіне бір шоқ гүлін табыстады. «Сізді қалың жұртшылық қазақ бейнелеу өнерінде өзіндік қолтаңбасы бар кескіндеменің хас шебері ретінде жақсы таниды. «Кесенеге кірер қақпа», «Жеңіспен оралу» және өзге де мазмұнды туындыларыңыз қазақстандық бейнелеу өнерінің алтын қорына енді» деген министр қылқалам шеберіне мәртебесі биік бейнелеу өнерінің нағыз майталманы ретінде еліміздің атақ-даңқын одан әрі арттыра беруіне тілектестігін білдірді. Іс-шараға қатысқан қонақтар арасынан «Дарын» мемлекеттік сыйлығы жазушы Айгүл Кемелбаева да С.Маханбетке ізгі тілегін білдіріп, суретші мен оның картиналары туралы эссе жазатынын жеткізді.
Еске сала кетсек, елордамыздың сол жағалауындағы «НАS SANAT» галереясында ашылған көрме наурыз айының 15-іне дейін ашық болады. Көрермендер назарына қылқалам шеберінің 65 картинасы қойылған. Келем деушілерге есік ашық.
