![43 елді мекенді су басу қаупі бар](/media/2024/02/26/pavodki.webp)
Өңірлік төтенше жағдайлар департаменті төтенше жағдайлардың алдын алу басқармасының бастығы Шакир Ахметовтің айтуынша, негізгі қауіп Баянауыл ауданында туындауы мүмкін.
«Қарағанды облысының аумағындағы Ақжар, Қаратоқа бөгеттерінен су мол келетін болса, Ащысу өзені тасып, жолай бірнеше елді мекенге қауіп төндіруі мүмкін. Жалпы, Баянауыл бойынша 17 ауылда су тасу қаупі бар. Топырақтың тоңдануы бойынша Успен, Шарбақты аудандарында алаңдаушылық бар, кейбір жерлерде екі метр тереңдікке дейін мұз қатқан. Көктемде қар жылдам еритін болса, елді мекендерді мол су басуы мүмкін. Сондықтан ойпаң жерлерде орналасқан ауылдар маңында топырақ үйінділерін тұрғызып жатырмыз. 26 мың дана құм толтырылған қапшық, 37 мың тонна инертті материал, 120 тонна жанар-жағармай қорын дайындап қойдық. Төтенше жағдайларға жедел ден қою үшін 1 702 адам, 616 бірлік техника, 42 жүзу құралы және 198 мотопомпалар дайын. Халықты эвакуациялаудың 43 пункті әзірленді. Биылғы қыс басынан елді мекендерден 636 мың текше метрден аса қар шығарылды, 10 наурызға дейін 1 475 су өткізу құбырын ашу жоспарланып отыр», дейді ол.
Ал «ҚазАвтоЖол» ҰК» АҚ Павлодар облысы бойынша филиал директорының орынбасары Алексей Логвиненконың дерегінше, өңірдің республикалық жолдарында су басуы ықтимал төрт учаске бар. Олар Баянауыл, Ертіс, Май аудандары аумағында орналасқан. Жазғытұрым қар күрт ерісе, кейбір жолдың үстімен қызыл су жүріп өтуі мүмкін.
Негізгі қауіп Қалқаман – Баянауыл – Үміткер – Ботақара автожолындағы екі учаскеге төнуі ғажап емес. Әсіресе 231-ші шақырымы осал деп танылып отыр.
«Бұл жерде су өткізетін екі тюбингті және бір темірбетонды құбыр орналасқан. Бірақ автожолдың өзі ойпаң жерде. Жазғытұрым сай-саламен жүгіретін су көп жиналса, жолдың үстімен жүріп өтетіні анық. Сондықтан біздің кәсіпорын қызметкерлері ол жерге ірі және қиыршық тас, құм толтырылған қаптар, өзге де инертті материалдарды дайындап қойды. Екінші учаске – 100–105-ші шақырым аралығы. Ол жерге екі және үш аралықты үлкен көпірлер салынған. Мұндағы асфальтты жол да ойпаңмен өтеді. Ащысу өзені арқылы ағыл-тегіл ағатын су қатты жайылса, жолға шығып кетуі ықтимал», деп ескертті маман.
Үшінші қауіпті учаске – Атамекен – Ертіс – Русская поляна бағытындағы республикалық жолдың Ресеймен шекаралас тұсындағы 5,8 шақырымдық айналма жол. Негізгі автожол жөндеуге жабылғандықтан, 2022 жылы айналма жол салынған. Былтыр су өткізетін құрылыстардың жеткіліксіздігінен айналма жолдың бір бөлігін су басып, биіктетілген жерді жырып өткен. «ҚазАвтоЖол» күшімен былтыр 11 су өткізетін құбыр төселіпті. Бірақ биыл Ертіс ауданында қардың мөлшері өте көп екенін ескерсек, бұл құрылыстардың төтеннен келетін мол суға төтеп бере алатынына күмән мол.
Соңғысы – Атамекен – Көктөбе – Үлкен Ақжар – Курчатов автожолының 213-шақырымы. 2018 жылы көктемде дәл жанынан өтетін теміржолдың үлкен су құбыры кенеттен ашылғанда, лап қойған су көлік жолын басып қалған. Биыл да сол жағдай қайталануы мүмкін.
Өңірлік жұмылдыру дайындығы және азаматтық қорғау басқармасының басшысы Қанат Кәрімовтің дерегінше, жалпы облыс аумағындағы барлық автожолда 1 279 су өткізетін құрылыс бар. Олар жергілікті атқарушы биліктің күшімен 10 наурызға дейін қардан аршылып, дайын тұруы керек. Жалпы, қыс басынан облыс аумағында орташа алғанда 96 мм қар түскен. Кейбір жерде, мәселен, Ертіс, Железин аудандарында ылғалдың аса мол қоры байқалып отыр.
«Қазгидромет» өңірлік филиалының бөлім басшысы Оксана Овсянникованың ойынша, қар суының жерге сіңуі баяу жүруі мүмкін. Синоптиктердің консультативтік болжамына сүйенсек, наурыз айы Павлодар облысында құбылмалы болады. Наурыздың үшінші онкүндігінде қар мен жаңбыр аралас боранды күндер жиі болуы мүмкін. Ал сәуір мен мамыр айында ауа температурасы әдеттегіден 1–2 градусқа жоғары болады деген болжам бар.
Павлодар облысы