«ҚазАвтоЖолдың» соңғы берген уәдесі бойынша, былтыр мамыр айында «Қарағанды – Алматы» тасжолы толығымен бітіп, жолаушылар автобанмен қатынауы керек-тін. Бірақ құрылыс жұмысына қажет материал бағасының күрт өсіп кетуіне байланысты мерзімі тағы кешеуілдеді. Енді биыл қарашаға дейін тәмам болуға тиіс.
Шынымен, тасжолға төселетін материалдың бағасы екі есе шарықтап кетіпті. Мәселен, ПЦ 400-Д0 маркілі портландцементтің құны сметалық құжатта – 16 330 теңге болғанда бекітілген екен. Қазіргі құны – 35 897 теңге тұрады. Жол құрылыс битумы 100/130 маркісінің жобалық-сметалық құжаттағы құны – 106 230 теңге болса, бүгінгі бағасы – 210 146 теңгеге қымбаттаған. Одан бөлек, арматураның жобалық-сметалық құжаттағы құнын 170 310 теңгемен есептесе, ол 376 202 теңгеге күрт көтерілген.
«Осыған байланысты жобалау-сметалық құжатқа түзетулер енгізілді. Соның салдарынан жұмыс жоспарын тағы бір жыл шегеруге тура келді. Бұл жағдайды «ҚазАвтоЖол» ҰҚ акционерлік қоғамы мен Индустрия және инфрақұрылымдық даму министрлігі Автомобиль жолдары комитеті бірлесе отырып қарастырды. Жобаның бастапқы құны 248 млрд теңге болса, қазір бағаның шарықтауынан 317 млрд теңгеге жетіп отыр», дейді «ҚазАвтоЖол» ҰҚ акционерлік қоғамының баспасөз қызметі.
Бүгінгі күнге дейін жұмыстың 85 пайызы орындалған. Құрылыс басталғалы жолдың астыңғы топырақ қабаты үшін 36,4 млн текше метр материал төселген.
«Яғни 714,8 шақырым астыңғы және 719,3 шақырым үстіңгі топырақты, қиыршық тасты қабаттар. Қазір жолдың 701 шақырымына (қарама-қарсы бағыттарды есептегенде) асфальт жабындысының бірінші қабаты төселген. Барлығы 720 шақырым болуға тиіс. Ал асфальт жабындысының екінші қабаты жолдың 158,6 шақырымына төселген. Жол бойында 4 шақырым айналма жолдар ғана қалды. Дегенмен автобанның қарама-қарсы бағыттарын бөліп тұратын қоршау мен жол белгілерінің жоқтығына байланысты көлік қозғалысы үшін барлық төрт жолағы бірден ашылмады. Тек екі жолағына ғана жүруге рұқсат етілген. Осы күнге дейін 11 көпір салынған. Ал су өткізу құбырларының жалпы саны 311 болса, соның 309-ы салынған. Қалған жұмыстар биыл аяқталуға тиіс. Қыс бойы құрылысқа қажетті материалдарды дайындадық», дейді «ҚазАвтоЖол» ҰҚ акционерлік қоғамының Қарағанды облыстық филиалының ресми өкілдері.
Білуімізше, алдағы құрылыс маусымына дайындық жұмыстары жүйелі жүріп жатыр. Биыл жұмысты межесіне жеткізу үшін 795 жол маманы мен 610 техника жұмылдырылады.
Ауыл шаруашылығы техникасына арналған 32 жол өткелі бойынша жұмыс 97 пайызға жүзеге асты. Балқаш қаласындағы жолайрық аяқталып, Ақсу-Аюлы елді мекенінен айналып өтетін жолайрық дайындалып жатыр. Мұнымен қоса, Балқаш қаласының айналма жолында теміржол арқылы өтетін жол өтпесі де дайын. Келісімшартта құрылыстың аяқталу мерзімі 2024 жылдың 30 қарашасы деп көрсетілген.
Енді жыл соңына дейін жобаның орындалу мерзіміне жанталасатын жауаптылар сапа жағын жылы жауып тастамаса дейміз. Дегенмен мұны «Жол активтерінің ұлттық сапа орталығы» жіті назарында ұстайды. Жауапты компания төрт жолақты автобанды жыл соңына дейін аяқтамай жыр қылса, онда көптің көкейінде «жолға бөлінген қыруар қаржы қолға кетті ме?» деген көлеңкелі ой туады.
Қарағанды облысы
