Осы реформаның арқасында әкімдерді тікелей сайлау тәсілі енгізіліп, әкімшілік реформа қолға алынды. «Бұл ретте бюджетаралық қатынастарды түбегейлі өзгерту де өте өзекті мәселе. Жаңа экономикалық үлгіге көшкенде аймақтардың бюджет мәселесіндегі дербестігін арттыру керек» деген болатын маңызды құжатта Мемлекет басшысы. Ал жақында Қарқаралы ауданындағы Қарқаралы қаласы, Егіндібұлақ, Қ.Аманжолов, Балқантау, Томар және Угар ауылдық округтерінде жаңа әкімдер сайланды.
Қарқаралы аудандық сайлау комиссиясы сайлау қорытындысын «Қазақстан Республикасындағы сайлау туралы» Конституциялық заңға сәйкес, учаскелік сайлау комиссияларының хаттамалары негізінде жария етті.
Қ.Аманжолов ауылының әкімі қызметіне Ербол Жоламан сайланды. Ол 1982 жылы туған. Бұған дейін ауданның жер қатынастары бөлімінің маманы болып қызмет атқарған. Қарқаралы қаласының тұрғыны. Кандидатты «Amanat» партиясы ұсынған.
Егіндібұлақ ауылдық округі әкімі қызметіне Бейбіт Айтмағанбетұлы сайланды. 1969 жылы туған. Өзі осы ауылдың әкімшілік аппаратында бөлім басқарған. Өзін-өзі ұсынған.
Томар ауылдық округінің әкімі қызметіне Нұрсылан Жағыпаров қайта сайланды. 1990 жылы туған, бұған дейін де Томар ауылдық округінің әкімі болған. Томар ауылының тұрғыны. Қайта сайланған әкімді кандидат ретінде «Amanat» партиясы ұсынған.
Балқантау ауылдық округінің сайланған әкімі – Ерсайын Қобыланды. 1994 жылы туған, «Қарқаралы ауданының жастар ресурстық орталығы» ММ-нің директоры. Қарқаралы қаласының тұрғыны. Бұл кандидатты да «Amanat» партиясы ұсынған.
Угар ауылына Жанат Әкімов жаңадан сайланды. 1967 жылы туған, «Рымхан» шаруа қожалығының жетекшісі. Қарқаралы ауданы Матақ ауылының тұрғыны. Өзін-өзі ұсынған.
Қарқаралы қаласының әкімі болып сайлаушылардың басым көпшілігінен дауыс алған Аслан Рахимбергенов сайланды. 1985 жылғы. Уақытша жұмыссыз болып тіркеулі. Қарқаралы ауданы, Балқантау ауылының тұрғыны. «Amanat» партиясы ұсынған.
Елдің сенімін еншілеген жаңа әкімдер өткен аптадан бастап қызметтеріне кірісті. Жолдауда жүктелген міндеттің қаншалықты жүзеге асырылып жатқанын халық үміт артқан осы әкімдердің алда атқарар нақты ісінен көруге болады.
Қарағанды облысы,
Қарқаралы ауданы
