Қоғам • 28 Ақпан, 2024

Ғалымдардың жалақысына қосымша үстемеақы төленеді

117 рет
көрсетілді
1 мин
оқу үшін

Жоғары оқу орындарында ғылыми-педагогикалық қызметпен айналысатын оқытушылардың, сондай-ақ ғылыми-зерттеу жұмыстарын жүргізетін ғалымдардың негізгі жалақысына қосымша ақы төленетін болады. Бұл туралы бүгін Мәжілістің жалпы отырысында айтылды, деп хабарлайды Egemen.kz.

Ғалымдардың жалақысына қосымша үстемеақы төленеді

Фото: gov.kz

Ғалымдардың негізгі жалақысына қосылатын қаражат мөлшері олардың ғылыми дәрежесі мен атағына байланысты болады. Мысалы, доцент атағы бар ғылым кандидаттары қосымша 25 АЕК, профессор атағы бар ғылым докторлары 50 АЕК алады.

Сонымен қатар жоғары оқу орындарында және ғылыми ұйымдарда жұмыс істейтін ғалымдарға ғылыми, ғылыми-педагогикалық және ғылыми-техникалық сипаттағы жұмыстарды аяқтау үшін бір жылға дейінгі еңбек демалысы беріледі. Осы кезеңде ұйымның өз қаражаты есебінен орташа жалақы сақталады. Қызметкердің кемінде бес жыл үздіксіз ғылыми-педагогикалық жұмыс өтілі болған жағдайда шығармашылық еңбек демалысы он жылда бір рет беріледі. Мұндай демалысты аяқтағаннан кейін ғалымдар осы ұйымда кемінде үш жыл жұмыс істеуге міндетті.