Жеті қазына деген ұғым құлаққа сіңіп, жадымызда жатталған соң тосындау тақырып екендігі де рас. Әйтсе де өзін-өзі ақтап тұр. Серінің кейінгі ұрпағына қалдырған мәйегі мол қазынасы көл-көсір. Табиғат бір бойына сан түрлі өнер сыйлаған Сәкен серінің қазақтың қара сөзінің қаймағын қалқыған шешендігін, алқалы топта сөз бастаған көсемдігін, әдемі қоңыр даусымен шырқап салған әншілігін көзіміз көрген. Ал боз кілемдегі белдесуін естідік. Ілкі замандағы ел тұрмысы, этнография шығармаларына шырай берген.
«Ақан сері» диалогиясында жаныңа соншалықты жақын бағзы заманның бейнесі құтты көркем суреттей бейнеленеді. Күреңбай сыншының Құлагерді сынауына көңіл аударыңызшы. «Шіркіннің тұрқын қарашы, тұрқын, он екі таспадан өрген ұзын бишіктей. Күзендей бүктетіле шапқанда тұрқы қысқа бұзау тұлып аттарыңның екі-үш аттағанын бір-ақ алатын қарышты жануар. Терісі қандай жұқа – көзел етіктің былғарысындай мап-майда. Ет пен терінің арасында жылтыраған бір май жоқ, басқа аттар көбікке малынғанда, құлағының түбі де жіпсімейтін көнбіс-ақ. Денесінде бір жапырақ арам ет жоқ, тамырлары білем-білем болып шодыраюын қараңызшы. Қанша шапса да басы айналмайтын, қаны мол, тынысы тарылмайтын құлаш кеңірдек, талыс танау... Жаясы қандай жазық, қасқыр жауырын, түлкі төс, қоян жонды – тәулікке танбай шапса да теңселіп, шатқаяқтамай садақтың оғынша түзу шабатын малдың белгісі».
Көрмеге тұғырына қондырылған домбыра, қыран бүркіт, берен мылтық, алмас кездік, құмай тазы, оюлы шапан тәрізді бұйымдар қойылыпты. Осының барлығы Сәкен серінің шығармасында бар нәшімен, қадір-қасиетімен, сыр-сымбатымен оқырман назарына ұсынылған. Елдің рухани қазынасын кемелдендіретін де, таным аспанын нұрландыратын да тұсы мол.
Көрменің ашылу салтанатында ақын Ерболат Баят, әдебиетші ғалым Сәбит Жәмбек тәрізді серінің көзін көрген азаматтар сөз сөйлеп, әдебиетті сүйетін қауымға есті естеліктерін айтып берді.
«Мұражайда мұндай шара тұңғыш рет өткізіліп отыр. Алдағы уақытта «Сандықтағы қазына» атты жобаны қолға алғалы отырмыз. Аттың жалында, түйенің қомында күн кешкен ата-бабамыз қымбат қазынасын сандығында сақтаған ғой. Ал біздің бүгінгі қазына бабаларымыздан қалған рухани мол мұраның жұқанасы», дейді музей директоры Құдайберлі Мырзабек.
Алтын сандық айқара ашылып, Көкшенің даласын көненің қазынасымен көркейтіп тұрса, тіпті ғажап емес пе!
Көкшетау
