Кеше Үкімет басшысы Олжас Бектенов жұмыс сапарымен Павлодар облысына келді. Премьер-министр Ертіс-Баян өңірінің өндірістік және мұнай-газ саласындағы іргелі жобаларымен танысып, Президент жүктеген тапсырмалардың жүзеге асу барысымен танысты.
Екібастұзда салынып жатқан балалар шығармашылығы сарайында келешекте 9 мыңның үстінде жасөспірім қосымша білім алады деп жоспарланған. Оның ішінде 1,5 мыңы – ерекше қажеттілігі бар балалар. Шаһар мектептерінде бүгінде 22 590 оқушы білім алса, олардың небәрі 31 пайызы, яғни 7 мыңға жуығы ғана мектептен тыс уақытын пайдалы өткізіп жатыр.
«Бұл – Мемлекет басшысының тікелей тапсырмасымен салынып жатқан нысан. Сондықтан сапасы да өте жоғары деңгейде болуы керек. Мұндай орталықтар балалардың бос уақытын қамтып, олардың шығармашылық қабілетін дамытуға, қосымша білім алуына мүмкіндік береді. Орталық іске қосылғаннан кейін қалада қосымша біліммен қамту деңгейі 71 пайызды құрамақ. Жоба жеке бақылауымда болады», деді О.Бектенов.
Келешек орталықтың нәтижесінде қаладағы 16 мың бала қосымша біліммен қамтылады деп күтіліп отыр. Шығармашылық сарайында шамамен 102 адам еңбекпен қамтылса, оның тең жартысы педагогтер болады деп жоспарланған.
«Үйірмелер 17 бағытта жұмыс жүргізеді. Олардың ішінде шығармашылық, өнер, музыка, IT-технологиялар қамтылады. Заманға сай ғимаратта ғарыштық радиобайланыс клубы, роботтехника студиясы, өнеркәсіптік сәулет және дизайн студиясы, ғылыми-биологиялық зертхана, коворкинг-аймақ, дыбыс жазу студиясы, фотография академиясы, көркем-эстетикалық шеберхана, спортзал және т.б. ашылады деп күтіліп отыр. Орталықтың өзі төменгі қабатымен есептегенде 4 қабатты нысан болып салынбақшы», деп атап өтті Екібастұздың әкімі Аян Бейсекин.
Олжас Бектенов коммуналдық-энергетикалық секторды жаңғырту жұмыстарының барысымен және тұрғындарды жылумен үздіксіз қамтамасыз ету шараларымен танысты. Екібастұз ЖЭО-да өңір әкімі Асайын Байханов Үкімет басшысына жылумен қамту жүйесін қалпына келтіру аясында барлық 10 қазандыққа күрделі жөндеу жұмыстары жүргізілгенін хабарлады. Станса көрсетілген параметрлерге сәйкес қалыпты қуатында жұмыс істеп тұр. Сонымен қатар 4 жылу магистралі мен орамішілік желілер де күрделі жөндеуден өтті. Жыл соңына дейін барлық магистральді желілерді цифрландыру аяқталады. Сондай-ақ өңір басшысы облыстың үш қаласында жөндеу науқанының жоспарын ұсынды. Екібастұз қаласы бойынша ТМ-1 және ТМ-2 жылу магистральдерін күрделі жөндеудің жобалау-сметалық құжаттамасы және Екібастұздағы кәріз коллекторы мен Майқайың су құбырын күрделі жөндеу жобалары әзірленіпті. Ал Павлодарда ТМ-13 құрылысы жүргізілсе, Ақсу қаласында орамішілік жылу желілері күрделі жөндеуді қажет етеді.
Премьер-министр Екібастұздың жылумен жабдықтау жүйесін қалпына келтіру үдерісін жалғастыру қажет екенін атап өтті. Үкімет тарапынан толықтай қолдау көрсетіледі.
«Біз Екібастұздың 2022 жылдың қысында қандай қиыншылықты бастан өткергенін білеміз. Мемлекет басшысының тапсырмасымен Үкімет резервінен жылумен жабдықтау желілерін жөндеуге және ЖЭО-ны жаңғыртуға 16,4 млрд теңге бөлінді. Меншік иелерімен бірлесіп, жылу орталығының тұрақты жұмысын қамтамасыз ету шаралар қабылданды. Барлық қазандық жөндеуден өтті. Қаланың жылу желілерін жаңғырту бойынша ауқымды жұмыс жүргізілді. Жұмыс қарқынын арттырып, жылу желілері мен жылу көздері жабдықтарының тозуын азайту қажет», деді О.Бектенов.
Көмірлі шаһарда сондай-ақ теміржол дөңгелектерін шығаратын «Проммашкомплект» ЖШС-ның жұмысы таныстырылды. Зауыт – Қазақстанда аталған өнімді шығаратын жалғыз кәсіпорын. Оның ассортименті халықаралық стандарттарға сәйкес келетін локомотивтерге, жүк және жолаушылар вагондарына арналған теміржол дөңгелектерінің 400-ден аса түрін қамтиды. Қуаты жылына 300 мың бірлік өнім шығаратын кәсіпорынды іске қосу Екібастұзда толыққанды теміржол кластерін құруға және импортты алмастыруға елеулі үлес қосуға мүмкіндік берді.
О.Бектенов аталған өндіріс орнының толық жүктемесін қамтамасыз ету маңызды екеніне тоқталды. Зауыт «Қазақстан теміржолы» компаниясының және өнеркәсіптік кәсіпорындардың қажеттіліктерін ішінара өтейді, сондай-ақ өнімді Әзербайжан, Қырғызстан, Ресей, Тәжікстан, Өзбекстанға жеткізіп отыр.
Түстен кейін Үкімет басшысы облыс орталығындағы мұнай-газ және металлургиялық кәсіпорындарын аралап, өндірістік көрсеткіштерін зерделеді. Мәселен, Павлодар мұнай-химия зауыты жылына шамамен 6 млн тонна мұнай өңдейді. Шығарылатын өнімдердің ішінде автомобиль бензинінің әртүрлі маркалары, дизель отыны, мазут, битум, коммуналдық-тұрмыстық газдар және т.б. бар. Премьер-министрдің сөзінше, Мемлекет басшысы ішкі нарықты отынмен қамтамасыз ету бойынша Үкімет алдына нақты міндеттер қойды. Осыған байланысты мұнай өңдеу зауыттары мұнай өнімдерінің бүкіл желісі бойынша өндіріс көлемін ұлғайту үшін барлық шара кешенін іске асыруы қажет.
«ҚазМұнайГаз» компаниясының төрағасы Мағзұм Мырзағалиев зауыттағы жаңғырту жұмыстарының арқасында қайта өңдеу көлемі 20 пайызға (16,6 млн тоннаға дейін), мұнайды өңдеу тереңдігі рекордтық 86 пайызға, ал жеңіл мұнай өнімдерін шығару 72 пайызға дейін өскенін баяндады. Автомобиль бензиндері өндірісін 80, ал дизель отыны өндірісін 30 пайызға ұлғайту есебінен ішкі нарықтың қажеттілігі толығымен қамтамасыз етілді. Бұған қоса бүгінде битум өндірісін еселеуге, қысқы суықта қатпайтын дизель отынын шығаруға күш салынып жатыр.
Үкімет басшысы сонымен қатар «Нефтехим LTD» компаниясы мен «KSP STEEL» ЖШС-да, Қазақстан электролиз зауыты мен алюминий зауытында болды. О.Бектенов Павлодар облысында мұнай-химия кластерін дамыту үшін барлық жағдай жасалғанын атап өтті. Атап айтқанда, «Нефтехим LTD» зауыты полипропилен өнімдерін импорттау мәселесін шешіп қана қоймай, сондай-ақ отынға қоспа түрінде экспортталатын жаңа бағытты игерді. Энергетика министрлігіне әрі қарай өндірісті ұлғайту үшін кәсіпорынды шикізатпен қамтамасыз ету мәселесін мұқият пысықтау тапсырылды.
Сапар соңын Ақсу қаласындағы ферроқорытпа зауыты мен «ЕЭК» АҚ электр стансаларында түйіндеді.
Павлодар облысы
