Ұстаздардың арасында тек өз жұмысын сүйетін, одан ләззат алатын, оқушылары мен студенттерін жақсы көргеннен жастардың жалынынан қуат алатындары ғана күш-қуатын жоғалтпайды. Ұлы Абай: «Ұстаздық еткен жалықпас – үйретуден балаға» дегенде нақ осындай ұстаздарды айтқан. Жанар Серкешқызы, міне, осы қағидаға дөп келген ұстаз. Ол өзінің көркем мінезінен ешқашан өзгермей, қажымай талмай, студенттерімен барынша жылы қарым-қатынас жасап келеді. Оның алдынан шыққан жастардың алғыстан басқа айтары жоқ.
Қазір ол М.Қозыбаев атындағы Солтүстік Қазақстан университетінің «Қазақ тілі және әдебиеті» кафедрасының профессоры, университет ректорының кеңесшісі, филология ғылымдарының кандидаты. Кандидаттық диссертациясын Әл-Фараби атындағы Қазақ ұлттық университетінің аспирантурасын аяқтағаннан кейін академик Мырзатай Серғалиевтің басшылығымен «Ғалым Малдыбаев поэзиясының көркемдік құралдары» атты тақырыпта қорғаған. Одан бері кафедра меңгерушісі, Тіл және әдебиет институтының директоры, одан «Рухани жаңғыру» өңірлік жобалық кеңсесінің басшысы, проректор секілді қызмет сатысынан өтіп, 2022 жылдан қазіргі қызметін атқарып келеді. Басшылық, ұстаздық қызметтен қол үзбей жүріп, 6 монографиясын жариялаған. Бұдан басқа ол 20 оқу және оқу-әдістемелік құралдардың жарық көруіне атсалысқан, АҚШ, Германия, Чехия, Болгария, Молдова, Беларусь, Ресей, Украина, Жапония елдерінде болған ғылыми-практикалық конференция материалдарында баяндамалары жарияланған, жалпы саны 200-ден астам ғылыми, 100-ге жуық қоғамдық-саяси, мемлекеттік тіл мәселелеріне қатысты мақалалары шыққан. Осының бәрі оның білікті ұстаз, жаңашыл педагог екенінің айғағы.
Оның жетекшілігімен 40-қа жуық магистрлік диссертация қорғалды. Кәсіби шеберлігін шыңдау мақсатында біліктілікті арттыру курстарынан өтіп, бірнеше сертификат алған. Ол Ұлыбритания, Польша, Ресей, Түркия, Қырғыз елдерінде ғылыми тағылымдамадан өтіп, «Жоғары оқу орындарының үздік оқытушысы – 2016» мемлекеттік грантының иегері болды. Қоғамдық жұмыстармен де белсене айналысады.
Ж.Таласпаева – үлкен шаңырақтың отанасы, балаларының аяулы анасы бола білген жан. Кәсіпкер болып істейтін жұбайы Қуандық екеуі Төлеген, Ділнәз есімді ұл-қыз өсіріп, қазір Астанада дәрігер болып істейтін ұлынан Айша деген немере сүйіп отыр. Ділнәзі – университеттің 2-курс студенті.
«Қазіргі жастардың бойынан қандай мінездерді көресіз?» дегенімізде, ол: «Қазіргі жастар арасында достықты, туысқандық қатынасты қажет етпейтін, өзімшіл жастар көбейген», деген өкінішін айтты. «Алайда қазір тәуелсіз еліміздің игілігін көрген, жаңаша ойлайтын, 2-3 тілді еркін білетін ұрпақ өсіп келеді. Олардың жоғары білікті маман болуға мүмкіндігі де, әлеуеті де жоғары», деді ол сеніммен.
Петропавл
