Ана қуанышы, әйел бақыты – отбасының, қоғамның, Отанның мерейі. Мемлекет басшысы Қасым-Жомарт Тоқаев атап өткендей: «Әрбір адам үшін анадан ұлы, анадан қымбат ешкім жоқ. Ең қастерлі құндылықтарымыз «Жер-ана», «Отан-ана» ұғымдарымен тығыз байланысты. «Ата ұлды, ана ұлтты тәрбиелейді» дейді. Бұл сөздің айрықша мән-маңызы бар. Ұлт болашағы ұрпақ тәрбиесінен басталады. Әр баланың жетістігі – ана махаббатының жемісі. Ұлы Абай айтқан «Толық адамға» тән асыл қасиеттер ұрпақтың бойына ана арқылы дариды».
Қоғамның өркениеттілігі әйел-анаға деген көзқарасынан көрінеді, сый-құрметінен білінеді. Елімізде ертеден әйел-анаға деген ерекше құрмет қалыптасқан. Ең асылымыз, ең қымбатымыз абзал анаға деп, ананың өмірдегі орнын барынша бағалайтын ата салтымыз бір де бұлжыған емес. Сонау ат ауыздығымен су ішкен, ер етігімен саз кешкен қадым замандардан кешегі тәуелсіздіктің тағдырлы жылдарына дейінгі тарихи шежіреде қасиетті әйел-ананың айқын қолтаңбасы бар. Сондықтан да халқымыздың бүгінгі күнге аман жетіп, тәуелсіз мемлекет құрып, әлемдік қоғамдастықтан өз орнын ойып алғаны үшін де біз ең алдымен күрескер ұлдарды дүниеге әкелген қазақ әйелдерінің алдында бас июге тиіспіз.
Тәуелсіздік тұғырына қонып, егемендік алғалы бері еліміз отбасының, ана мен баланың жағдайын жасау бағытында қолдан келетін шаралардың барлығын жүйелі ұйымдастырып келеді. Президент жанында Әйелдер істері және отбасылық-демографиялық саясат жөнiндегi ұлттық комиссия тұрақты жұмыс істейді. Еңбек және халықты әлеуметтік қорғау, Оқу-ағарту, Ғылым және жоғары білім, Денсаулық сақтау министрліктері мен осы саладағы мекемелердің алдында тұрған ауқымды іс-шаралардың орындалуы да жылдан жылға жақсарып, оң арнаға түсіп келеді. Қазіргі кезде облыстарда, қалалар мен аудандарда да әйелдерге нақты бағытталған түрлі әлеуметтік қолдау шаралары жүзеге асырылып жатыр.
Мемлекет басшысының сындарлы саясатының арқасында қоғамымызда қалыптасып отырған рухани келісім мен ұлтаралық татулық, тұрақтылық пен бірліктің бұлжымай жүзеге асуында қазақ әйелдерінің де зор үлесі бар. Бүгінде қоғамдық-саяси өмірімізде әйелдер өздерінің қарым-қабілеті мен қамқорлығын танытпайтын бір де бір сала жоқ.
Өткен жылдар ішінде әйелдердің азаматтық белсенділігі де елеулі дәрежеде өсті. Мемлекет және өкілетті органдардағы әйелдер саны арта түсті. Парламентте 28 әйел депутат, Үкіметте үш әйел министр бар. Өнеркәсіптің негізінен әйелдер жұмыс істейтін салаларын жандандыру жөнінде бірнеше мемлекеттік бағдарлама жүзеге асырылып жатыр. Әйелдердің денсаулығына қамқорлық көрсету бағытында да бірқатар іс тындырылды. Кейінгі кезеңдердегі қоғамдағы түрлі жағдайларға байланысты әйелдердің, ана мен баланың құқықтарын қорғау үшін қажетті заңнамалар үздіксіз жетілдіріліп, толықтырылып жатыр.
Тегінде тек мереке күндерінде емес, әрқашан, барлық уақытта да әйел-аналардың әл-ауқатына, тұрмыс-тіршілігіне назар аударып отыру қажет. Сонда ғана өмірді бақыт пен шаттыққа айналдыруға, ананың қас-қабағына қарай отырып, қоғамның қилы мәселелерін қапысыз шешуге болады. «Ана жүрегі – алдамайтын таразы», «Анасын ренжіткендерді Алла тағала да жақтамайды», «Ананың алақаны – айдынды қоныс» сынды мақал-мәтелдер де халқымыз үшін ананың орны қаншалықты қадірлі екенін аңғартады. Сондықтан әйел-аналардың жан әлемі әрқашан бақытқа, қуаныш-шаттыққа, мерейге тола беруі үшін қолдан келгеннің бәрін жасау керек.
Ошақтың отын маздатып, шаңырақтың шырайын кіргізіп, береке мен бірліктің ұйытқысы болып отырған, Отанымыздың келешегі – жас ұрпақ тәрбиелеуге жүрегінің күшін, бойындағы қайрат-жігерін сарқа жұмсап келе жатқан абзал аналарға құрмет көрсету – қоғам үшін, әрбір саналы адам үшін биік мәртебе, зор ғанибет.
