2022 жылы Бас прокурор жергілікті деңгейдегі барлық прокурорға, сондай-ақ елдің құқық қорғау органдары басшыларына кәсіпкерлерді заңсыз қудалауға жол бермеу жөнінде нұсқау бергені белгілі. Нұсқауға сәйкес кәсіпкерлерге өзіне қатысты үкім шыққаннан кейін де одан әрі шағымдану құқығы, сонымен бірге тиісті тексеру нәтижелері туралы актімен танысу мүмкіндігі берілді. Мұндай тәртіп 2023 жылы Қызылорда облысы кәсіпкерлеріне қатысты қылмыстық істерді тіркеу фактілерінің санын екі есеге азайтуға септігін тигізді.
Бұл өзгерістердің нақты мысалдарына тоқталсақ, облыстық прокуратура органдарының қызметкерлері кәсіпкерлік субъектілеріне қатысты қозғалып, бірнеше жыл көлемінде шешімін таппаған 45 қылмыстық істі анықтап, барлығын ақтау негіздерімен тоқтатты. Қылмыстық қудалау органының 2 кәсіпкердің шетелге шығуын шектейтін заңсыз шешімі анықталып, жойылды. 3 кәсіпкердің мүлкі тыйым салудан босатылып, шектеулер алынып тасталды.
Кәсіпкерлік қызметке кедергі жасау фактісі бойынша 1 қылмыстық іс қозғалып (Қылмыстық кодекстің 365-бабы), тергеу нәтижесінде сотқа жолданды. Кінәлі адамға қатысты сот үкімімен 3 жыл бас бостандығын шектеу жазасы бекітілді.
Жуырда Қызылорда облысында бизнесті заңсыз қудалаудан қорғау бойынша дөңгелек үстел өтіп, онда прокурорлардың осы бағытта атқарған жұмыстары, кәсіпкерлік субъектілерін бақылаушы және құқық қорғау органдары тарапынан негізсіз қысым жасаудан одан әрі арашалау жөніндегі проблемалық мәселелер талқыланды. Күн тәртібіндегі мәселелерді талқылауға соттар, күш құрылымдары және бірқатар мемлекеттік орган басшылары, сондай-ақ кәсіпкерлер палатасының директоры атынан облыстың бизнес қоғамдастығының өкілі қатысты.
Облыс прокуроры Р.Ожаров құқық қорғау және өзге де уәкілетті мемлекеттік органдар басшыларының назарын кәсіпкерлердің құқықтарына кедергі келтіретін, шектейтін шешімдер мен әрекеттерге аударды. Сонымен қатар ол мемлекеттік органдар тарапынан осы бағыттағы бірлескен күш-жігердің айқын болуы және кәсіпкерлер өз тарапынан қолдауды тұрақты негізде сезінуге тиіс екенін атап өтті.
