Фото: Қорғаныс министрлігі
Құзырлы орган тұрғындарға жағдайды бұрмалап, жалған ақпарат таратпауды сұрады.
«Қарулы күштердің жауынгерлік дайындық бағдарламасы шеңберінде 13 наурыз күні Ақмола гарнизоны әскери бөлімдерінің әскери қызметшілері Астана қаласының маңындағы белгіленген аудандарға жауынгерлік техникамен марш жасайды. Іс-шара гарнизон әскери бөлімшелері күштері мен құралдарының жауынгерлік әзірлігін кешенді тексерудің кезекті кезеңіне бағытталған», деп мәлімдеді министрлік.
Жауынгерлік дайындық жүргізу кезінде елорда маңында, Қарағанды трассасында әскери техника легі өтіп бара жатқан кезде жолда автокөлік қозғалысына уақытша шектеу енгізілуі мүмкін.
«Осыған байланысты азаматтардан өтіп жатқан іс-шараларға түсіністікпен қарауды және тыныштықты сақтауды сұраймыз. Сонымен қатар әлеуметтік желілерді пайдаланушылардан әскери техниканың қозғалысы туралы жалған хабарламалар мен бейнематериалдар таратпауды және тек ресми ақпарат көздеріне сенуді сұраймыз», делінген хабарламада.
