Біржанды Біріккен Араб Әмірліктерінің әуе команиясы Қазақстаннан шақыртып алған. Қазір келісімшарт негізінде істейді. Әуе жүргізушісі әлемнің түкпір-түкпіріне жолаушы тасиды. Оны алпауыт шетелдік компания басшылары үш күндік сынақтан соң бірден жұмысқа алған.
«Шетел әуе компаниясында жұмыс істеу – үлкен тәжірибе мектебі. Әлемнің әртүрлі мекеніне ұшып, әртүрлі ұлт өкілдерімен әріптес болу, олардың әдет-ғұрпын, тілі мен мәдениетімен танысу көңіл көкжиегімнің ашылуына әсер етеді. Қазақстаннан шыққан ұшқыштар Қатар, Вьетнам, Гонконг тағы басқа да дүниежүзілік әуе компанияларында жұмыс істеп жатыр. Ал бізге авиация саласын дамытуға әлі де көп тер төгу керек. Жаңа ұшу терминалдары салынып, жаңа бағыттар ашыла берсе, әуе қызметі де заманауи жағынан дами түспек», деген пікір айтты ол.
Алысқа көз тастасақ, оның өмірі көзін ашқалы бері ұшақпен байланысты. Неге десеңіз, әкесі Талғатбек ұшақтарға техникалық қызмет көрсету орталығында жұмыс істеген. Ресейдегі Чкалов атындағы авиациялық техникалық колледжінде, сосын Алматыдағы Азаматтық авиация академиясында оқыған. Бала кезінде әкесі үнемі «Ан-24», «Ту-134», «Як-42», «Ту-154» ұшақтарында қалай инженер-механик болып жүргенін айтып береді екен.
Алғашында арман қуып Алматы қаласындағы әкесі оқыған Азаматтық авиация академиясына оқуға түскен. Дегенмен бірінші курсты аяқтаған соң оқуын тастап кеткен. Солай жүріп «Air Astana»-ның «Ab-Initio» ұшқыштарды дайындау бағдарламасы аясында емтихан тапсырады. Сынақты сәтті тапсырып, жақсы нәтиже көрсеткен Біржан Америкадағы «Aerosim Flight Academy»-ге оқуға түседі. Онда бір жарым жыл оқып, кейіннен Белгияның Шарлеруа қаласындағы «Belgian Flight School» ұшқыштарды даярлау мектебінде 3 ай білім алады. Оқуын бітірген соң еліміздегі әуе компаниясында ұшқыш болып 7 жыл істеген. Ал осыдан 3 жыл бұрын әлемдік компанияларға жұмыс істеу мақсатында құжатын жіберген. Оның ойынша, шетелдік компаниялардың төлейтін жалақысы біздің елдегі еңбекақымен салыстырғанда әлдеқайда мол. Қызметкерлерге жан-жақты жағдайда да жасап береді. Ал біздің «Отандық әуе тасымалдау саласын әлі де дамыта түсу керек», деп ойлайды Біржан.
Қазір ол 600 адамдық Airbus A380 ұшағында екінші пилот болып жұмыс істейді. Көбіне АҚШ, Аустралия елдерінің, Еуропаның ірі қалаларына ұшады. Негізінде дүниежүзінің барлық континенттеріне рейстер бар. Үлкен ұшақ болған соң ұзақ рейстер жасайды. Орташа алғанда 12-13 сағатты алады, оның ең ұзақ сапары – Біріккен Араб Әмірліктерінен АҚШ-тың Калифорния штатына ұшу кезінде болған. Ол кезде 16-17 сағаттай әуеде болыпты.
«Біріккен Араб Әмірліктерінде ұшқыштарға барлық жағдай жасалған. Компания тұратын үйді өздері береді. Шағын отбасы болса қаладан пәтер жалдап береді. Көпбалалы отбасы болса, жер үйден береді. Ұшқыштың балаларын халықаралық оқу орындарында тегін оқытады. Медициналық сақтандыру бар және жылына бірнеше рет ұшу билеттерін тегін береді. Ұшқыштың физикалық және психологиялық денсаулығы үнемі әлемдік стандартқа сай болуы керек. Ұшқышқа да қойылатын талап өте жоғары. Аспанда болуы мүмкін күрделі жағдайларға әрдайым дайын болуымыз керек», деп ақтарылды ұшқыш.
Қазақты өзге елге танытып жүрген Біржан домбыраны да шебер ойнайды. «Елді сағынғанда домбыра серігім» дейді ұшқыш.
