Іс-шараның ашылуында Ғылым және жоғары білім министрлігі Жоғары және жоғары оқу орнынан кейінгі білім комитетінің төрағасы Гүлзат Көбенова Назарбаев университетінің білім беру жүйесінде көшбасшы даярлаудағы үлесі мол екенін айтты.
72 сағаттық тренинг гибридті форматта ұйымдастырылып, ол онлайн және тәлімгерлік сессияға жалғасты. Топтық сабақ кезінде тыңдаушыларды оқыту үдерісіне тарту үшін оқытудың белсенді және интерактивті әдісі мен түрлі цифрлық құралы пайдаланылды. Сондай-ақ оқу үдерісінің тиімділігі үшін Moodle білім беру платформасы қолданылды.
Интенсивті курста Пиа Колхо, Эсси Рюмин, Йоханна Эрлинг, Ари Покка және Қайрат Құрақбаев секілді халықаралық және отандық сарапшылар білім берудегі көшбасшылықта жаңа технологияны қолдануға байланысты тақырыптарды қозғады.
«Бұл семинар бізге ауыл мектебін қала мектептерінің деңгейіне жетуге талпындыра түсті. Біз мұнда ұжыммен тығыз жұмыс істеп, әр адамның ойы құнды екенін үйрендік. Қателесуден қорықпауды түсіндік. Өйткені біз бұған дейін қателесуді айып көруші едік. Енді ауылға барғаннан кейін осында алған тәжірибемді әріптестеріммен бөлісемін», деді Жетісу облысындағы Жетіжал орта мектебінің директоры Әділет Нұрғалиев.
Курс барысында қатысушылар сарапшылармен бірге білім беру саласына байланысты тапсырманы орындап, қорытынды жобамен жұмыс істеді. Үш топқа бейімделген жаңа білім беру бағдарламаны іске асырудың өзіндік жол картасы жасалды. Мәселен, жоғары оқу орындарының басшылары болашақ көзқарасқа сәйкес қызметкерлер мен ресурстарды басқаруға назар аударса, сапаны қамтамасыз ету жөніндегі университет департаменттерінің өкілдері жаңа білім беру бағдарламасының қағидатына сәйкес келетін сапаны үздіксіз ішкі бағалау үдерісін құруға мән берді. Ал мектеп директорлары жаңа білім беру бағдарламасына қатысты жоғары оқу орындары мен мектептер арасындағы ынтымақтастық байланысқа тереңірек үңілді.
«Тренингте талқыланған өзекті мәселенің бірі – мектеп пен университет арасындағы байланыс. Біз осы мәселенің шешу жолын іздестіріп, әріптестермен ой бөлістік. Мысалы, мен университеттің оқу бөлімінде істеймін. Сондықтан осы курста оқу үдерісін басқару, оған жетекшілік жасау және ұйымдастыруда біраз тәжірибе алдым. Енді оны жұмыс барысында қолданамын», деді Абылай хан атындағы Қазақ халықаралық қатынастар және әлем тілдері университетінің қызметкері Жұмагүл Қарабаева.
Айтпақшы, аталған тренинг Ғылым және жоғары білім министрлігі мен Оқу-ағарту министрлігі және Дүниежүзілік банктің қолдауымен «Педагогикалық білім беру моделін енгізу және оның мазмұнын нығайту» атты ауқымды жоба аясында өтті. Биылғы қаңтар-маусым айы аралығында осы жоба шеңберінде еліміздегі жоғары оқу орындары мен мектептердің 2 150 маманын біліктілік арттыру курсынан өткізу жоспарланған.
