Суретті түсірген – Ерлан ОМАР, «EQ»
Қазақтың ділі мен мәдениетіне, тұрмысына, ішіп-жеміне қатысты барлық ұлттық ерекшелігі жарқырата көрініп, қай тұсқа қарасаң да қазақы құндылықтарға қаныға түсесің. Кең дала төсінде ат шаптырып, балуан күрестіріп, арқан тартысып сайысқан қазақ, сан түрлі оюы көздің жауын алған бау-басқұрмен жасанған киіз үй маңында бауырсақ ұсынып, көже пісіріп, шашу шашқан қазақ, жыр-термесін төгілтіп, ақындарын айтыстырып, мың бұрала билеп, сәбиінің тұсауын кескен қазақ... Шолпысы сылдырап, күлкісі сыңғырлап, қос етек көйлекті бастыра киген қызыл-жасыл қамзол, бешпет, кәжекей, күмісі жарқыраған жадағайларынан шаттықтың лебі ескен аналар мен қыз-келіншектер, дөңгелек бөрік, көрікті шапандарымен маңғаздана топ жарған үлкен-кіші ерлер... Қазақтың қуанышына үн қосқандай қорада мал төлдеп, далада жер гүлдеген әдемі табиғи көрініс... Халқымыздың ұлттық сән-салтанаты, рухани байлық-мәдениеті ақтарыла көрінетіндіктен Наурызды әзіл-шыны аралас «ұлттық ай» деп иемденетініміз бар.
Қазақтың жоғарыда айтылған құндылықтарын, әсіресе ұлттық киімдерін жыл он екі ай киіп жүруге, тұтынуға не кедергі? Қазір түрлі шеберлер мен стилист-дизайнерлердің қолымен ұлттық киімдеріміз заманауи талапқа сай жаңғыра тігілуде. Бірқатар шеберлер алыс-жақын шетелдерге шығып, түрлі көрмелер мен байқауларға қатысып, ұлттық киімімізді әрі танытып, әрі дамытып, әрі сатып, тұтынушысын тауып та жүр. Тіпті Маңғыстаудағы кейбір тігіншілерге шетелдіктерден арнайы тапсырыс түсіп, бірнеше жадағай, шапан шетел асты. Осы орайда Ақтау қаласындағы №19 мектеп-гимназиясының бастамасы қуанарлық. Мектепте бастауыш сынып оқушылары арасында тек наурыз айында емес, оқу жылы басталғалы сабаққа бірыңғай түстегі тақия мен заманауи үлгідегі кеудеше киіп келіп жүргендер бар. Киім оқушыларға ұнайды, ата-аналар қолдау көрсетіп отыр, ал ұстаздар ұлттық идеологияны насихаттаудың, бүлдіршіндерді отансүйгіштік сезімде тәрбиелеудің бір бағыты санап қуануда. Үш мыңнан аса оқушы оқитын мектепте бастауыш сыныптардағы ұл-қыздардың киімі жоғары сыныптағы аға-апаларының қызығушылығын тудырып, олар да ұлттық киім киюге ықылас танытқан. Мұндай жағдайдың өткен жылдары наурыз айы қарсаңында еліміздің өзге өңірлерінде де бастау алғанын білеміз.
Оқушылардың бастамасы ересектер тарапынан неге қолдау таппайды? Ұлттық киімді тек той-томалақ, наурыз айында ғана емес, үнемі киіп жүрудің несі әбес? Дау-дамайы көп, ашық-шашығы көп қазіргі қоғамда ұрпақты адастырмай баба жолымен тәрбиелеймін дегендер үшін ұлттық киім – баға жетпес байлық, тәрбиенің өзі. Шетелдіктер қызыққан қазақ киімінің қадірін өзіміз біліп, өзіміз қолдап, өзіміз тұтына жүрейік...
Маңғыстау облысы
