Аймақтар • 18 Наурыз, 2024

Бауырсақ party

99 рет
көрсетілді
1 мин
оқу үшін

Жұртшылық асыға күткен көгілдір көктемнің ұлы мере­кесі – әз Наурыз Қонаев қаласында да кең көлемде басталды. Қала жұртшылығы «Көрісу күнін» айрық­ша атап өтті. Ұлттық салт-дәстүрімізбен қатар, ұлттық тағам­дарымызды насихаттау мақсатында «Бауырсақ party» ұйымдастырылып, қала қонақтарына дәмі тіл үйірер 2000 келі бауырсақ пісіріліп, үлестірілді.

Бауырсақ party

Аталған іс-шара мәдениет қыз­меткерлерінің ұйытқы болуымен қала­лық кітапханада өтті. Бұдан бөлек, Шеңгелді және Арна ауылдарында да ұйымдастырылып, тұрғын­дар­дың береке-бір­лігін паш етті. Игі бас­­тамадан кәсіп­керлер де қалыс қалмай, дәм­ханаларға келушілерге ыстық бауырсақ ұсынды. Сөйтіп төс қағысып, құтты болсын айтысып, арқа-жар­қа болған мереке күні Қонаев қаласы тұрғындарына бар­лығы 2000 келі бауырсақ таратылды.

«Арна ауылында өткен «Бауырсақ party» көрісу рә­сіміне ұласты. Қазақы мәде­ниеттен сыр шертетін рәсімге ауыл халқы қуана қатысып, белсенділік танытты. Жұрт бауырсақ жеп, наурыз көжеден де дәм ауыз тиді. Дү­бірлі той өнерпаздардың ән-жыр мен би шашуына жалғасты. Мереке соңында Ораза ұстаған жамағатқа қа­тымханада ауызашар да берілді», дейді Қонаев қала­сы әкімдігінің баспасөз қыз­меті.