Өндіріс • 19 Наурыз, 2024

Жаңа желі іске қосылды

308 рет
көрсетілді
5 мин
оқу үшін

Қостанай қаласындағы «Allur» зауытында «Chevrolet Оnix» авто­мобиль­дерін шығаратын жаңа CKD кешені іске қосылды. Жаңа кешен­ді іске қо­су рәсіміне Өнеркәсіп және құ­рылыс министрі Қанат Шарлапаев, «General Motors» және «UzAuto» ком­па­ниялары топ-менеджерлері қатысты.

Жаңа желі іске қосылды

33,7 млрд теңгені құрайтын жаңа жоба аясында «Allur» зауыты жылына 30 мың автокөлік шығаруды жоспарлап отыр. Сондай-ақ жоғары білікті мамандар үшін 400 жаңа жұмыс орны ашылмақ.

Еске салайық, 2022 жылы Қазақстан мен «General Motors» компаниясы бірлескен «Chevrolet» CKD өндірісін қолға алу туралы келісімге келген болатын. Сәл кейінірек, 2022 жылдың 22 желтоқсанында телекөпір байланысына шыққан Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев аталған жобаның басталғанын ресми мәлімдеген.

Өнеркәсіп және құрылыс министрі Қанат Шарлапаев машина жасау саласы Қазақстан экономикасының стратегиялық маңызды бағыты болып саналатынын, ал «General Motors» сынды әлемнің алдыңғы қатарлы компания­сын өндіріске тарту елімізде қарқынды дамып келе жатқан автокөлік саласына жаңа серпін әкелетінін атап өтті.

«Бүгін бүкіл Қазақстан өндірісі үшін өте маңызды күн. Мен «Allur» зауы­тының қызметкерлеріне арнайы алғыс айтқым келеді. Бүгін сіздер Қазақстанның индустриялық бола­ша­ғына негіз салды­ңыздар деуге болады. Біз үшін және «General Motors» әріп­тес­тері үшін жобаны одан әрі дамыту және өнді­рістің жергілікті үлесін арттыру өте маңызды», деді министр.

вппапа

Жобаны іске асыру үшін техно­ло­гиялық шешімдер үлгісін ұсынатын және өнеркәсіп құрылғыларын жеткізумен айналысатын жетекші компаниялар тартылып отыр. «CKD Оnix» Қазақстан үшін ғана емес, Орталық Азия елдері үшін де бірегей жаңа өндірістік кешен болып саналады. Мамандар аталған жобаның іске қосылуы «Allur» зауытына Қазақстан авто­көлік индустриясындағы ең жоғар­ғы­ деңгейде автоматтандырылған кәсіп­орын мәртебесін беретінін айтады.

Қостанай облысының әкімі Құмар Ақсақалов өңірдің жоғары оқу орындары мен колледждері осындай ірі жобалар үшін болашақ машина жасау мамандарын мақсатты түрде оқытып жатқанын мәлімдеді.

«Соңғы 4 жыл ішінде машина жасау факультеттеріндегі студенттер саны 5 есе артты. 2025 жылдың қорытындысы бо­йынша, кәсіпорындарда жұмыс істейтін түлектер саны тағы 2 есе көбейетінін байқап отырмыз. Бұл жастар үшін, еліміздің болашағы үшін өте маңызды», деді әкім.

«Chevrolet Оnix» өндірісінде «General Motors» компаниясының сапа стан­дарттарына сәйкес келетін жоғары сапалы және аса дәлдіктегі лазерлік астас­тыруды қамтамасыз ететін робот­тан­дырылған лазерлік дәнекерлеу технологиясы қолданылады. Қазір за­уытта заманауи роботтандырылған құрылғыларды пайдалану арқылы өндірісті автоматтандырудың жоғары деңгейіндегі пластикті бояу цехі­нің құрылысы жүріп жатыр. Сонымен қатар елімізде алғаш рет автокомпоненттер шығаратын локализациялық орталықтың құрылысы басталады.

«Екіжақты кооперациялық ынты­мақ­тастық аясында біз үнемі өсу мен өндіріс ауқымын кеңейту мүмкіндіктерін іздейміз. «UzAuto», «Allur» және «GM» инвестициялары мен күш-жігерінің арқасында бүгін осы маңызды кезеңге – Қостанайда «Chevrolet Onix» CKD-өндірісінің басталуына қол жеткіздік. Автокөлік өндірісінің көлемі жылына 50 мыңды құрап отыр. Қазір Қазақстан әлемдегі «Chevrolet» нарығының көлемі бойынша жетінші орында. Бұл біздің табысты серіктестігіміздің дәлелі», деді «General Motors International» президенті Шилпан Амин.

«General Motors» компа­ния­сының жаһан­дық нарықтар жөніндегі президенті және атқа­рушы вице-президенті Рори Хар­ви өз кезегінде Қазақстанда «Chevrolet» автокөліктерінің сапалы өнді­рі­сін қолға алып жатқан өнеркәсіптік коо­пе­рацияға қатысушы тараптардың қажырлы еңбегін жоғары бағалап, алғыс білдірді.

2023 жылы «Allur» инженерлері «Gene­ral Motors» зауыттарында 8 ай бо­лып, арнайы оқу-тәжірибе курсына қа­ты­сып қайтқан. «Allur» қызметкерлері оқы­ту­дың барлық кезеңінен өтті және жа­ңа модельді шығаруға қажетті білік-бі­лім­­ді толық игерді», дейді зауыт басшы­лары.

«Allur» зауытының операциялық директоры Виталий Христ жаңа жоба өңір дамуына оң ықпал ететінін айтты.

«Былтыр біздің зауыттың кон­ве­йер­­лері 90 мыңнан астам автокөлік шы­­ғарды. Бұл – отандық автокөлік өн­ді­рісіндегі ре­корд­тық көрсеткіш. Жаңа іске қосылып отыр­ған «Chevrolet Оnix» жо­ба­сының муль­­­типликативті әсері бар. Өйт­кені машина жасау саласында бір жұ­мыс орнының құ­ры­л­уы осы өндірістің айна­ла­сындағы салаларда бес-алты жұмыс ор­ны­ның пайда болуына ықпал етеді», дейді Виталий Христ.

 

Қостанай облысы 

Соңғы жаңалықтар

Алғыс арқалаған хирург

Маман • Бүгін, 10:10

Қатерлі ісікпен алысқан

Медицина • Бүгін, 09:50

Үздік отбасылық дәрігер

Медицина • Бүгін, 09:40

Марқакөлдің мейіргері

Медицина • Бүгін, 09:30