Француз әдебиеті бүкіл Еуропаның интеллектуалды және көркемдік дамуында басты орын алғаны баршаға аян. Әдеби бұрышқа сол талай оқырманның жанын жылытқан, таңғалдырып, тамсандырған әлемге әйгілі француз шығармалары қойылады. Ал ашылу рәсіміне француз елшілігінің өкілдері мен Француз альянсы қатыспақ.
Шырқайды бұлбұл
5 сәуір күні КСРО және Қазақстанның халық әртісі Бибігүл Төлегенованың 95 жылдығы аясында «Ән әлемінің бұлбұлы» атты моноконцерт өтеді.
Ән кешінде Жамбыл облыстық филармониясының әншісі, Мәдениет саласының үздігі Әсел Уашева Бибігүл Ахметқызының репертуарындағы «Көктем вальсі», «Гауһартас», «Мама» секілді өзге де бірнеше әнді орындайды. Сондай-ақ моноконцертте Бахром Муминов, Диас Әбілеков бастаған әншілер де өнер көрсетеді. Моноконцерт филармонияның ютуб арнасы арқылы көпшілік назарына ұсынылмақ.
Сәуірдегі сыйлықтар
Алдағы бір ай бойы «Астана опера» театрының К.Байсейітова атындағы Камералық залында Франция мен Қазақстанның орындаушылары өнер көрсетеді. Сәуірге арналған бағдарламаны «Астана опера» оркестрінің бірінші скрипкасы, Қазақстанның еңбек сіңірген қайраткері Бағдат Әбілхановтың жаңа жобасы – «Музыкалық альянс» камералық кештер топтамасы ашады.
2 сәуірде И.С.Бах, В.А.Моцарт, А.Казадезюс, Й.Бенда мен басқа да композиторлардың туындылары театрдың Камералық оркестрінің, сондай-ақ скрипкашылар Бағдат Әбілханов, Әсем Жақпарова, Балнұр Құдайберген және альтшы Олеся Морозованың орындауында шырқалады. «Музыкалық альянс» топтамасының екінші концерті 25 сәуірде өтеді. Тыңдармандарға Е.Брусиловский, А.Жұбанов, М.Төлебаев, Ғ.Жұбанова, К.Күмісбеков, М.Сағатов, А.Тоқсанбаевтың шығармалары мен халық күйлерінің заманауи өңдеулері ұсынылады.
Кино көр де, «Алқаға» кел
6 сәуірде Ұлттық академиялық кітапханада «Алқа» әдеби-мәдени клубының кезекті отырысы өтеді. Тақырып – режиссер Фрэнк Дарабонттың «Жасыл миль» фильмін талдау.
Ойталқыға қаламгерлер мен клуб мүшелері, кітапхана оқырмандары қатысады. Аталған кинотуындыны көрген болсаңыз, клубтың отырысына барып, ой-пікіріңізбен бөліссеңіз болады.
