«Келер ұрпақ Шәкен ағамыздың қандай адам болғанын, оның өмірі қалай өрілгенін білсін деген ниеттен туып отыр. Жинаққа Олжас Сүлейменов, Әбіш Кекілбаев, Асанәлі Әшімов, Бибігүл Төлегенова, Әкім Тарази, Әшірбек Сығай және әйгілі әртіспен иық тіресіп жұмыс істеген өзге де өнер қайраткерлерінің естелік мақалалары енді. Көлемі 345 бет болып шықты. Шәкен аға қандай фильм түсірсе де, ұлттық құндылықтарды дәріптеген. Осы ерекшеліктерді негізгі ұстаным етіп, кітаптың баянына сіңірдік», деп атап өтті кітаптың құрастырушысы, филология ғылымдарының кандидаты, С.Торайғыров университетіндегі Е.Бекмаханов атындағы өлкенің тарихы мен мәдениетін зерттеу орталығының директоры Амантай Құдабаев.
Кітаптың тұсаукесеріне орай Шәкен Аймановтың 110 жылдығына арналған халықаралық ғылыми-практикалық конференция өтті. Оған Павлодар облысының әкімі Асайын Байханов, Қазақстанның еңбек сіңірген қайраткері, кинорежиссер, сценарист, продюсер, Қазақ ұлттық өнер университетінің профессоры Сламбек Тәуекел, Қазақстанның еңбек сіңірген әртісі Шахимардан Әбілов, театр және кино актері Ергенбай Әбу және С.Торайғыров университетінің ғалымдары қатысты.
– Шәкен Айманов – қалыпқа сыймайтын тұлға еді. Қазақ кино өнерінің негізін салушылардың бірі болып қана қойған жоқ, оны әлемге танытып, мойындатты. Оның Ресейде, КСРО-ның өзге елдерінде, шет мемлекеттерде достары көп еді. Мен Мәскеуде білім алып жүргенде Шәкен аға іссапармен келе қалса қазақ жастарын іздеп, арнайы қонақ ететін. Бізге өз қолымен палау басып беруші еді жарықтық. Қарапайымдылығында шек жоқ. Бірде Мәскеуде өткен фестивальде ағылшын-американ актрисасы Элизабет Тейлормен жұптасып билеп, бірінші орынды жеңіп алды. Ал енді әзілқойлығы бөлек өнертұғын. КСРО кино және театр майталмандарының арасында абырой-беделі өте биік болды. 1970 жылы желтоқсан айында туған еліне сүйегін алып кетуге барғанымызда Мәскеудің бүкіл зиялы қауымы күңіреніп қоштасты, – деп тебіренді Сламбек Тәуекел.
Шахимардан Әбілов те режиссерден тәрбие алып, тағылымын көрген жан. Ол Шәкен ағаның Лондондағы халықаралық фестивальде Отеллоның монологін қазақ тілінде оқып, актерлік шеберлігімен жергілікті көрерменді тәнті еткенін, соңынан гран-при жүлдесі тағы бір актермен қоса Аймановқа да берілгенін майын тамыза әңгімеледі.
Конференцияда Бұқар жырау атындағы әдебиет және өнер музейі Ш.Айманов пен Кәукен Кенжетаевтың шығармашылығы мен өмірі жайында көрме ұсынды.
Павлодар облысы
