Халық • 08 Сәуір, 2024

Көмектің алғы шебінде – әскери ұшқыштар

55 рет
көрсетілді
2 мин
оқу үшін

Өткен тәулікте апаттан құтқару шараларына Қарулы күштердің 450 әскери қызметшісі, 23 көлік техникасы, төрт тікұшақ және әскери-көліктік авиация ұшағы жұмылдырылды.

Көмектің алғы шебінде – әскери ұшқыштар

Ақтөбе қаласының Әуе қорғанысы күштері мен ұшқыштар дайындайтын институттың ұшу экипаждары жергілікті халықты эвакуация­лау, мамандарды тасымалдау және гума­нитарлық жүктерді жеткізу шараларын жал­ғастырып жатыр. Әскери авиация бортымен 50 адам тасымалданды.

Су тасқынына қарсы іс-шараларға Сол­түстік Қазақстан, Қостанай облыс­та­рының аумақтық қорғаныс бригадалары жұ­мыл­дырылды. Қызылжар ауданы Теп­лич­ное аулында әскери қызметшілер бөгетті кү­шейтумен айналысты. Қостанайда Тобыл өзе­нінің жағалауын нығайту жұмыстары жүргізілді. Қостанай облысының Арқалық қаласынан 85 шақырым жерде Қызыл жұлдыз елді мекенінде әскерилер әкімдіктің жедел шта­бына 20 орындық армия шатырын орналастырды.

Қарағанды облысында «Астана» өңірлік қолбасшылығы 44803, 55524 әскери бөлімдерінің және мотоатқыштар бригадасының әскери қызметшілері құм салынған қаптарды да­йындап, төсеумен, су айдаумен, каналдарды тазалаумен, үйлердің айналасындағы қарды тазалаумен және бөгеттер айналасына үйінділер жасаумен айналысты. Жұмыстар Көбетей, Нұра, Егінді, Мыңбай, Кертінді елді мекен­дерінде жүргізілді.

Орал қаласында аумақтық қорғаныс брига­да­сының әскери қызметшілері Бәйтерек ауданының «Жырау» саяжай алабында 1200 қап құм және «Аз ауыл» шағын ауданында 1300 қап дайындады.

«Батыс» өңірлік қолбасшылығы 41433 әскери бөлімінің әскери қызметшілері Аты­рау облысының Құлсары қаласында Құл­сай өзе­нінің жағалауын күшейтуге кө­мек­тесті, ал Индер ауданының Қарабал аулында Ойыл өзе­ні жағалауын күшейтуге 1500 қап құм төсел­ді.

Жалпы, 27 наурыз бен 4 сәуір аралығында Қарулы күштерден барлығы 1255 әскери қыз­метші, 69 көлік техникасы, армия авиа­циясының 10 тікұшағы, әскери-көлік авиациясының 2 ұшағы жұмылдырылды. Екі мыңнан аса адам эвакуацияланды, оның ішінде 590 бала. 66 тоннадан астам гуманитарлық жүк тасымалданып, 42 мыңнан аса қап құм төселді, бір жарым шақырым ағын су кәрізі тазартылды.

Соңғы жаңалықтар

Болмысы биік тұлға

Тағзым • Кеше

БАҚ пен тіл

Сұхбат • Кеше

Тасқын су толастамай тұр

Аймақтар • Кеше