Фото: aikyn.kz
30 мыңға жуық адам эвакуацияланды
Жылыой ауданында 86 939 тұрғын тұрады. Олардың арасында зейнет жасындағы 7 400, мүгедектер санатындағы 2 465, кәмелетке толмаған 37 069 бала, сәби күтіп жүрген 1 004 жүкті әйел бар. Тұрғындардың 60 мыңнан астамы Құлсары қаласында тіркелген.
Жылыой ауданы әкімдігінің мәліметінше, 4 сәуірде тасқын судың қаупіне байланысты төтенше жағдай жарияланды. Ал 5 сәуірде Жем өзеніндегі су көтеріліп, соның салдарынан Құлсары қаласының ортасымен ағатын Құрсай өзегі арнасынан асты. Тасқын су алдымен моноқаладағы «Жадырасын» шағын ауданына, 2 және 3-ауылға кірді.
Бір күнде Құлсары қаласындағы 500-ден аса нысанды тасқын су басты. Оның ішінде тұрғын үйлер, әлеуметтік нысандар, әкімдік ғимараты мен сауда орталығы бар. Орталық стадион да тасқын судың ортасында қалды. Кеше су басқан нысандар 2 800-ден асты. 6 бизнес нысанының ауласына су кірген.
Облыстық жедел штабтың мәліметінше, тасқын су қаупіне байланысты 31 наурыздан бері аудан орталығынан тұрғындар қауіпсіз жерге көшіріліп жатыр. 7 сәуірде сағат 08.00-ге дейін Құлсары қаласындағы «Атырау», «Достық», «Мирас», «Жадырасын», «Мерей», «Шұғыла», Мешіт маңы ауылынан қауіпсіз жерге эвакуацияланғандар саны 29 545 адамға жетті. Оның ішінде 7 396 бала бар. Эвакуациялық пункттерге 8 011 адам орналастырылды. Олардың 4 578-і – балалар.
Облыс әкімінің орынбасары Жасұлан Бисембиевтің мәліметінше, Жылыой ауданының тұрғындарын үш бағытқа – Маңғыстау облысына, Атырау қаласы мен «Теңіз» кен орнындағы вахталық кентіне көшіру жүріп жатыр. Мәселен, вахталық қалашықта 10 мың орын дайындалған. Қазір оған 6 577 тұрғын эвакуацияланды.
Жылыой аудандық орталық ауруханасының бас дәрігері Асұлан Абдрахмановтың айтуынша, 70 науқас көршілес өңірге жеткізілген. Науқастарды Маңғыстаудағы Бейнеу аудандық ауруханасына тасымалдау үшін 14 жедел жәрдем көлігі, 2 автобус бөлінген.
«Жағдайы ауыр науқастарды тасымалдауға реаниматолог, анестезиолог дәрігерлері мен толық жабдықталған ИВЛ аппаратын қоса жібердік. Жатып баратын науқастар жедел жәрдем көлігімен, өзгелері автобуспен қатынады», деді А.Абдрахманов.
Сонымен қатар Құлсары қаласында екі адамның мүрдесі табылды. Атырау облыстық төтенше жағдайлар департаментінің қоғаммен байланыс тобы мәлім еткендей, екі ер адам 6 сәуірде трактормен аударылып кеткен. «Жылыой ауданының Құлсары қаласында 1974 жылғы ер адам досымен бірге рұқсат ету құжатынсыз су басқан тұрғын үйді тексеру үшін трактормен бармақ болған. Алайда трактор жолдан шығып кетіп, аударылып қалды. Олардың мүрдесі 7 сәуір күні сағат 11:00 шамасында табылды», деп хабарлады департаменттің қоғаммен байланыс тобы. Іздеу жұмыстарына жеке құрамнан 3 адам және 1 жүзу құралы жұмылдырылды.
Жайықтан қауіп төне ме?
Атырау облысы әкімінің орынбасары Ж.Бисембиевтің айтуынша, Жылыой ауданында тасқын сумен күресуге дайындық екі апта жүргізілген. Бірақ тасқын су бой бермеді. Енді Индер, Махамбет аудандары мен Атырау қаласы орналасқан Жайық өзенінен қауіп төну мүмкін бе? Бұл сауал атыраулықтарды алаңдатып отыр.
«Су басу қаупі Ресейдегі Орынбор, көршілес Орал қалаларындағы тасқыннан кем болмайды деген болжам бар. Әлбетте дайындық жүріп жатыр. Өңірдегі құрылыс индустриясы, мұнай саласындағы 26 компания Жайық өзенінің жағалауын бекітуге кірісті. Қажетті қап, күрек және инертті заттар материалдардың резерві дайындалды», дейді Ж.Бисембиев.
Оның дерегіне сүйенсек, Индер ауданында Жайық өзенінің жағалауындағы қауіпті аумақтарға 10 км бөгет соғылып, 37 мың 950 қап пайдаланылды. Ал Махамбет ауданындағы елді мекендерді судан қорғау бөгетінің жалпы ұзындығы – 80 км.
«Жайық жағасындағы 17 елді мекендегі 9 қорғаныс бөгеті осал. Олар Талдыкөл, Бейбарыс, Алға, Махамбет, Сарытоғай, Ескі Сарайшық, Еңбекшіл, Есбол және Ортақшыл ауылдары тұсында орналасқан. Ал Атырау қаласында жағалаудағы 12 аумақты бекітуге 172 техника тартылды. Биіктігі 2 метр, жалпы ұзындығы 7 км бөгет салынды», деді Ж.Бисембиев.
Әкім орынбасарының айтуынша, Атырау қаласында Жайық жағалауындағы жұмыстарды атқаруға 5 мыңнан аса адам кіріскен. Бұл іске 4 мыңға жуық еріктілер тобы үлес қосып жүр. Алайда бұл әлі де жеткіліксіз болып отыр. Себебі Орынбор облысындағы Ирикла су қоймасынан жіберілген су мөлшері күн сайын өсіп отыр. Мұндай су көлемі осы кезге дейін болмаған. Сондықтан Жайық жағалауындағы бөгетті биіктетіп, бекіту қажет. «Көп түкірсе – көл» дегендей, әр адам бір қап құмды жағаға әкелсе, үлкен бекет болары сөзсіз.
Атырау облысы
