Асқарларға бастайтын айтулы күн

«Өрлеу» АҚ Ақмола облыстық педагог кадрларының біліктілігін жетілдіру институтында Тұңғыш Президент күніне арналған дөңгелек үстел мәжілісі болып өтті. Оның жұмысына Көкшетау қаласының құрметті азаматтары, қоғамдық бірлестіктер өкілдері, жоғары оқу орындары мен колледждердің және аталған институт оқытушылары қатысты. Институт директоры, Ха­лық­­аралық ақпараттандыру ака­­демиясының мүше-кор­рес­понденті, қалалық мәс­лихат­тың депутаты Еркін Исім­баев өз сөзінде Тұңғыш Пре­зидентіміздің орасан зор еңбегін Қазақстанның жедел өркендеу арқылы әлемнің озық мемлекеттері қатарына қойы­луымен байланыстырды. Еліміз Тәуелсіздік жылдарында ғасырға татырлық абыройлы асулар биі­гінен көріне білді. Бұл орайда, тү­бегейлі әрі жарқын өзгерістер Елбасымыз Н.Назарбаевтың мемлекет құрудағы салиқалы саясаты, көрегендік бастамалары нәтижесінде жүзеге асқанын мақтаныш және бүкілхалықтық алғыс сезімімен паш етеміз. Бү­гінгі күрделі кезеңде эко­но­микалық, әлеуметтік жаңғыр­тулар негізіндегі игі қадамдар қазақстандық үлгі моделін алға шығарып отырғаны бола­шағымыздың жарқындығын ай­қындайды. – 1991 жылдың 1 желтоқ­са­нында бүкілхалықтық сайлау арқылы біздің еліміз өзінің Тұңғыш Президентін сайлады және сол сәттен Тәуелсіз Қазақстанның тарихы басталды, – деді Ақмола облыстық ішкі саясат басқармасының басшысы Айна Мысырәлімова. – Бұл жаңа өмірді өз қолдарымен жасап жат­қан көпұлтты халқымызды асқарларға бастайтын маңызды сәт екендігі дәлелденіп отыр. Сіз­дердің баршаларыңызды, об­лыс жұртшылығын Тұңғыш Президент күні мейрамымен құттықтаймын. Облыстық педагог кадр­ла­р­дың біліктілігін жетілдіру институты директорының орынбасары, педагогика ғылымдарының магистрі Айсұлу Ақышева, Ш.Уә­лиханов атындағы Көкшетау мемлекеттік университетінің оқытушысы Ғалымтай Төлеп­бергенов, А.Мырзахметов атын­­дағы университеттің кафедра меңгерушісі Ардақ Қапы­шев қосымша баяндамаларын­да еліміздің Қазақстан Респуб­ликасының Тұңғыш Президентінің басшылығымен тәуелсіздік діңгегін тіктеудегі қарышты қадамдардың маңызды кезеңдеріне талдау жасады. Ел өміріндегі айтулы мерекенің ерекшеліктері жөнінде Көкшетау қаласы ардагерлер кеңесінің төрағасы Рүстем Шериязданов, Көкшетау қала­сының құрметті азаматы Зура Шуатаева, абыз қария Фарук Багапов Тәуелсіздіктің алғашқы жылдарында Елбасы Нұрсұлтан Назарбаевпен кездесу кезіндегі әсерлерімен бөлісті. Сондай-ақ, этномәдени бір­лестіктердің жетекшілері Р.Сул­карнаев, А.Артеменко, Ауған со­­­ғысы ардагерлері кеңесінің мүшесі Қ.Қосмағамбетов, №1 техникалық колледжінің оқушысы А.Цингалиди өз сөздерінде ұлтаралық келісім мен бейбіт өміріміздің кепілі ретінде Тұңғыш Президентіміздің көрегендік саясатына жоғары баға берді. Кездесуде «Елбасының фено­мені» бейнефильмінің көрсетілуі мерекелік салтанаттың әрін аша түсті. Бақберген АМАЛБЕК, «Егемен Қазақстан». КӨКШЕТАУ.