Сондай-ақ Цифрлық даму, инновациялар және аэроғарыш өнеркәсібі министрлігі облыстық әкімдіктердің сұранысына сай тасқын су басқан өңірлерге 48 «Starlink» терминалын жіберді. Дәлірек айтқанда, Қостанай облысына – 30, Ақтөбе облысына – 3, Батыс Қазақстан облысына – 3, Ұлытау облысына –1, Атырау облысына – 6, Шығыс Қазақстан облысына –2, Солтүстік Қазақстан облысына – 3 терминал берілді. Бұл алдымен үздіксіз оқу үдерісін қамтамасыз ету үшін сол өңірдегі мектептерге жеткізіледі. Сонымен қатар осы аптада республика көлемінде бір уақытта қосылуға қосымша терминал кешенін жіберу жоспарланып отыр.
Қазіргі таңда 447 ауыл мектебі «Starlink» технологиясын қолданып, ғаламтормен қамтылды. Терминалды орнатқаннан кейін мектептердегі интернеттің орташа жылдамдығы 200 Мбит/с жетеді. Бұдан басқа ұялы байланыс операторлары тасқын шайған аймақтағы абоненттердің тарифтік жоспарына қосымша ресурстар (40-50 мин, 40-50 СМС және 7 күнге 8-10 Гб) қосты. Министрлік жедел, үздіксіз байланысты ұйымдастыру үшін Ақтөбе облысының әкімдігіне «Thuraya» (2 дана) спутниктік телефонын пайдалануға берді.
Ал «Astana Hub» су тасқынын басқару бойынша 30-дан аса инновациялық шешімді жинап, оларды қарау үшін Төтенше жағдайлар министрлігіне тапсырды.
Америкалық стартап «ARC Drones» негізін қалаған Әлібек Елтай мен Әсел Тұрсын еліміздегі су тасқынына қарсы көмек көрсетуге автономды дрондарын ұсынды. Технопаркпен серіктестік аясында 3 ұшқышсыз ұшатын аппараттар медициналық, гуманитарлық және басқа да қажетті заттарды шалғай өңірлерге жеткізеді.
