Суретті түсірген – Жеңіс Ысқабай
«Қорғас» ірі логистикалық хабына «The Hansa Consortium» компаниясы 250 млрд теңге қаржы құймақшы. Бірлескен жобаның жүзеге асуы 700 жұмыс орнын құрады деп күтіледі. Жоба қуаты 50 мың тонна жүк тасымалдауға, жолаушылар терминалынан сағатына 500 адамға дейін өткізуге қабілетті.
«Бүгінде «Қорғас – Шығыс қақпасы» АЭА-ның бірыңғай тізіліміне 56 қатысушы тіркелген, оларда жалпы құны 800 млрд теңгеден асатын жобалар бар. «KTZE-Khorgos Gateway» құрғақ порты – арнайы экономикалық аймақтың негізгі нысандарының бірі. Бұл – Орталық Азиядағы аумағы 103 гектарға жуық жерді алып жатқан ең ірі құрғақ порт және теңіз логистикалық хабтарының айрықша баламасы. АЭА аумағында инвесторлар үшін, сол қатарда шетелдік инвесторлар үшін де жеңілдіктер мен артықшылықтар, арнайы тарифтер қолданылады. Қатысушы саны жыл сайын артып келе жатқандықтан, аумақта халықаралық жүк-жолаушылар әуежайының ашылуы транзиттік әлеуетті одан әрі дамытуға оң ықпал етеді», деді облыс әкімі Бейбіт Исабаев инвесторлармен кездесуде.
«Skymax tehnologies» компаниялар тобы» ЖШС Бас директоры Ерік Шортанбаевтың айтуынша, үш кезеңнен тұратын жоба аясында халықаралық жүк-жолаушылар әуежайын салудан бөлек, қажетті инфрақұрылыммен қамту, өндірістік қуатты ұлғайту, қонақүй, сауда-ойын-сауық орталығын іске қосу көзделген. Осылайша, жоба 2032 жылы толығымен аяқталады. Бірақ әуежай 2027 жылы пайдалануға беріледі деп жоспарланған.
Е.Шортанбаевтың айтуынша, жобаны іске асырудың бірінші кезеңінде әуежайдың негізгі инфрақұрылымы салынады, ал екінші және үшінші кезеңдерде қосымша инфрақұрылымдарды аяқтау, жолаушылар терминалының өткізу қабілетін, жүк және отын қоймаларының қуатын кеңейту қарастырылған. Сондай-ақ инвесторлар сауда, туристік қызмет, тамақтану және орналастыру қызметтерінің кешенін кеңейтіп, дамытуға ниетті. Атап өтсек, әуе лайнерлеріне заманауи Jet a-1 отыны пайдаланылмақ.
Бейбіт Исабаевтың сөзінше, жобаны іске асыру үшін мемлекет тарапынан қажетті қолдау көрсетіледі.
«Стратегиялық маңызды жобаның сәтті аяқталуы үшін сыртқы инфрақұрылымды жүргізу мәселесінде заң аясында қажетті қолдау көрсетуге дайынбыз. Сіздердің қандай міндеттеме алатындарыңызды, біздің тарапымыздан нақты қандай қолдау керектігін, соның бәрін әр кезеңге егжей-тегжей нақты белгілеу керек», деді өңір басшысы. Кездесу соңында тараптар ынтымақтастық туралы меморандумға қол қойды.
Жетісу облысы
